2018-02-25 13:53:22
Ο ΚΑΝΩΝ ΚΑΙ ΤΟ ΣΥΝΟΔΙΚΟΝ ΥΠΕΡ ΤΗΣ ΟΡΘΟΔΟΞΙΑΣ ΣΥΜΦΩΝΑ ΜΕ ΤΟ ΒΙΒΛΙΟ ΤΟΥ ΚΑΤΑΝΥΚΤΙΚΟΥ ΤΡΙΩΔΙΟΥ
(ἐκδ. Φῶς ΧΕΕΝ, Ἀθῆναι 2010, σσ. 173-178, 618-635)
Μετά τήν Ἀπόλυσιν τοῦ Ὄρθρου, καί πρό τῆς Λειτουργίας, λιτανεύομεν κοινῶς μετά τῶν ἁγίων τοῦ Σταυροῦ ξύλων, καί τῶν σεπτῶν Εἰκόνων, καί ἀπερχόμεθα ἐν τόπῳ ὡρισμένῳ, ὅπου δεῖ ἀναγινώσκειν τό Συνοδικόν. Πορευομένων δέ καί ἀναστρεφόντων ἡμῶν, ψάλλομεν τόν παρόντα Κανόνα, ποίημα τοῦ ἁγίου Πατρός ἡμῶν Θεοδώρου τοῦ Στουδίτου.
Ὠδη α΄. Ἦχος πλ. β΄.
Βοηθός καί σκεπαστής….
Χαριστήριον ὠδήν, τῷ εὐεργέτῃ Θεῷ τῶν ὅλων, ἄσωμεν πιστοί, ὅτι ἤγειρεν ἡμῖν, σωτήριον κέρας, βασιλείαν κραταιάν, Ὀρθοδοξίας πρόμαχον. (Δίς)
Ἐπεφάνη ἀληθῶς, ἡ θεία χάρις, τῇ Οἰκουμένῃ, δόξα καί τιμή, πεφανέρωται νῦν, σκιρτᾷ Ἐκκλησίᾳ, δεξαμένη τήν στολήν, τῆς ἑαυτῆς γυμνώσεως.
Τόν χιτῶνα τοῦ Χριστοῦ, διερρηγμένον ὑπό τοῦ πλάνου, καί φαρμακουργοῦ, Ἰωάννου τό πρίν, οἱ θεῖοι Πατέρες, ἐξυφάναντες σαφῶς, τῇ Ἐκκλησίᾳ ἔδωκαν.
Τοῦ Κυρίου τήν μορφην, ἀπολαβοῦσα ἡ Ἐκκλησία, χαίρει καί σκιρτᾷ, σύν τοῖς τέκνοις αὐτῆς, ὡς νίκης βραβεῖα, δεξαμένη παρ’ αὐτοῦ, Ὀρθοδοξίας σύμβολα.
Αἰσχυνθήτωσαν λοιπόν, καί ἐντραπήτωσαν μεμηνότες, Λῆζιξ ὁ δεινός, καί Ἀντώνιος, σύν τῷ Ἰωάννῃ, καί Θεόδωρος ἀμφοῖν, οἱ ἀρνηταί τῆς πίστεως.
Ἰαννῆς καί Ἰαμβρῆς, ἀνθεστηκότες τῷ νομοθέτῃ, πάλαι Μωϋσῆ, κατησχύνθησαν· νυνί δέ ὁ πλάνος, Ἰωάννης ἀληθῶς, σύν Ἀντωνίῳ δείκνυνται.
Σύ διέρρηξας Χριστέ, τήν ξυνωρίδα τῶν θεομάχων, καί τόν στολισμόν, ἀποδέδωκας νῦν, τῇ σῇ Ἐκκλησίᾳ, ὑπέρ ἧς ὡς ἀγαθός, τό Αἷμα σου ἐξέχεας.
Δόξα Σέ Τριάς θεολογῶ, καί προσκυνῶ σου τό θεῖον κράτος˙ ρῦσαι πειρασμῶν, ἐκ παντοίων με˙ εἰς σέ γάρ πιστεύω, τόν Πατέρα και Υἱόν, καί Πνεῦμα τό Πανάγιον.
Καί νῦν… Θεοτοκίον
Τήν βασίλειον στολήν, ἐκ σοῦ Παρθένε Θεός φορέσας, ὤφθη τοῖς βροτοῖς, ἀνθρωπόμορφος, διπλοῦς κατ’ οὐσίαν˙ οὗ τό εἶδος τῆς μορφῆς, ἐν προσκυνήσει ἔχομεν.
Ὠδη γ'. Στερέωσον Κύριε…
Εὐφραίνεσθε ἅπαντες, χοροί Πατέρων και Ἀποστόλων, καθορῶντες τήν προσκύνησιν, τῶν Εἰκόνων, ἥν περ ἐμφανῶς παρεδώκατε. (Δίς)
Τό κάλλος μου ἔλαβον, καί τήν στολήν μου ἐνεδυσάμην, ἐκβοάτω ἡ πανάμωμος, Ἐκκλησία, ἥν περ Ἰωάννης ἐξέδυσεν.
Αἰσχύνθητε ἄνομοι, ἐρεσχελοῦντες κατά Κυρίου˙ ἐσαρκώθη καί ἐφάνη γάρ, ἐν εἰκόνι˙ ἥν περ σχετικῶς ἀσπαζόμεθα.
Τά βέβηλα δόγματα, καί τάς ἀθέσμους διδασκαλίας, Ἰωάννου τοῦ παράφρονος, τίς ἐξείποι, τρόπους δελφικούς ἐκτιθέμενος;
Ἀνάθεμα Λήζικι, καί Ἰωάννῃ σύν Ἀντωνίῳ, Θεοδώρῳ τῷ ἀθέῳ τε, καί βλασφήμῳ, ἅμα Θεοδότῳ παράφρονι.
Τά αἵματα κράζουσι, τά ἐκχυθέντα ὑπερ τῆς θείας, σαρκοφόρου ὁμοιώσεως, τοῦ Δεσπότου, ἅπερ Ἰωάννης ἐξέχεεν.
Ἐδίωξε Κύριος, τήν ξυνωρίδα τῶν ἀλλοτρίων, καί ἀπέδωκε τά ἴδια, τοῖς ἰδίοις. Δόξα τῇ αὐτοῦ ἀγαθότητι.
Δόξα…
Τήν ἄναρχον θέλησιν, καί ἐξουσίαν καί βασιλείαν, τῆς Τριάδος προσκυνήσωμεν, ὀρθοδόξως, Ἄρειον ἀεί στηλιτεύοντες.
Καί νῦν... Θεοτοκίον
Κυρίως σε Δέσποιναν, ὁμολογοῦμεν Θεόν τεκοῦσα, μή προσέχοντες τοῖς ρήμασι, Νεστορίου, ἀλλά τῶν Πάτερων τοῖς δόγμασιν.
Ὠδή δ'. Ἀκηκοεν ὁ Προφήτης Ἀγάλλου ἡ Ἐκκλησία καί πᾶσα πόλις και χώρα ἐν εὐφροσύνῃ, ἀνοιγέσθω νῦν τά ἀσκητήρια, καί οί παρθενῶνες καλλωπίζεσθε˙ τά Λείψανα, καί Εἰκονίσματα τῶν Μαρτύρων, ἀξίως προσκυνείσθωσαν. (Δίς)
Χριστός ὑμᾶς προσκαλεῖται, συνέλθετε νῦν προθύμως, θείοι Πατέρες, καί τήν θέαν τῆς αὐτοῦ σαρκώσεως, Ἀποστολικῶς ἀνιστορήσατε, τά θαύματα καί τά παθήματα, καθώς γράφει, τό θεῖον Εὐαγγέλιον.
Ἀθροίσθητε γεγηθότες, τά πλήθη τῶν Μοναζόντων ἐν παρρησίᾳ˙ ἐάν γάρ κακῶς ἰσχύσωσι, πάλιν ἠττηθήσονται οί δείλαιοι˙ καί ἥν ἄν βουλήν βουλεύσωνται οἱ τοιοῦτοι, διασκεδάσει Κύριος.
Αἱ μάστιγες τῶν Πατέρων, τά αἵματα τῶν μωλώπων ἔλειψαν ὄντως˙ ἐξορίαι συνεχεῖς ἐπαύσαντο, καί εἰρήνη πᾶσι πολιτεύεται˙ οὐκέτι ἰσχύσει τό δρᾶμα τῆς γοητείας˙ Θεός γάρ μεθ’ ἡμῶν ἐστιν.
Ἡ ἄμπελος τῆς κακίας, ἐξέτεινε τά κλήματα τῆς ἀσεβείας, καί τόν βότρυν τόν πικρόν, ἐξήνθησε, καί θυμός δρακόντιος ὁ οἶνος αὐτῶν˙ ἐξ οὗ τόν λαόν τοῦ Κυρίου ἐπότισαν ὄντως, τήν θολεράν κακόνοιαν.
Ἐμίαναν τόν Ναόν σου, ἀθέσμοις χειροτονίαις διά χρημάτων, καί κανονικῶς οὗτοι ἐκβέβληνται, καί τῆς θείας δόξης ἐκπεπτώκασιν, ὁ Σίμων ὁ μάγος, σύν τούτῳ καί Ἰωάννης, καί ὁ δεινός Ἀντώνιος.
Τούς θῆρας καί θεομάχους, Ἀντώνιον τόν βέβηλον, καί παραβάτην, Ἰωάννην τόν σατανογνώμονα, καί τῆς Ἐκκλησίας πολεμήτορα, ὡς λύκους βαρεῖς συνελθόντες, Ἀνάθεμα τρίς, πιστοί ἀναβοήσωμεν.
Δόξα…
Ἡ ἄκτιστος Μοναρχία, Πάτερ Υἱέ καί Πνεῦμα σέ προσκυνοῦμεν˙ ἥν τά Χερουβίμ τά πολυόμματα, καί τά Σεραφίμ τά ἐξαπτέρυγα, ὑμνοῦσι κραυγάζοντα˙ Ἅγιος, Ἅγιος, Ἅγιος εἶ ὦ Παντοκράτορ Ὕψιστε.
Καί νῦν... Θεοτοκίον
Ἁγίων ἁγιωτέρα, καί πάντων ὑψηλοτέρα τῶν ποιημάτων, μόνη ἀνεδείχθης Μητροπάρθενε, ὡς αὐτόν κυήσασα τόν Πλάστην σου˙ διό τήν ἁγίαν μορφήν σου Θεογεννῆτορ, ἐν προσκυνήσει ἔχομεν.
Ὠδή ε'. Ἐκ νυκτός ὀρθρίζοντα...
Ὁ Χριστός νενίκηκε, σκιρτάτω ἡ γῆ˙ πέπαυται θόρυβος, πέπαυται καί ὁ κλαυθμός, τῶν τοῦ Κυρίου δούλων˙ ἡ πίστις δε πανταχοῦ, τῷ Κόσμῳ ἐφηπλώθη. (Δίς)
Ἐν εἰκόνι βλέποντες τήν Σταύρωσιν, σέβοντες στέργομεν, ἀσπαζόμενοι Χριστόν, καί τά αὐτοῦ σημεῖα, καί προσκυνοῦμεν αὐτά, οὐχ ὡς θεούς τιμῶντες.
Πνεῦμα τό πολύρρημον καί βλάσφημον, Λήζικος πέπαυται, τό λαλοῦν διαπαντός, ἡμέραν καθ' ἡμέραν, κατά τῆς θείας μορφῆς, Χριστοῦ καί τῶν Ἁγίων.
Ἵνα τί τρισάθλιε μεμίσηκας, μόρφωσιν ἄχραντον, τῆς σαρκώσεως Χριστοῦ, καί τῶν Ἁγίων πάντων; μή γάρ εἰδώλοις κωφοῖς, οἱ πιστοί προσκυνοῦμεν;
Ἀσεβείας ὄργανα τυγχάνοντες, ἤθροισαν σύνοδον, ἱερέων ἀσεβῶν, κατά Θεοῦ ὑψίστου, ὡς Ἰουδαῖοι τό πρίν, Ἄννας καί Καϊάφας.
Ἐν ἡμέρᾳ Κρίσεως πανάθλιε, στήσονται ἔλεγχοι, τῆς ἀθεου σου ψυχῆς, ὁ δῆμος τῶν Πατέρων˙ ὧν περ ἀμέτροις πληγαῖς, ἐγύμνωσας τάς σάρκας.
Ἐκκλησίαι ἅπασαι βοήσουσι , κράζουσαι ἅπασαι στερηθεῖσαι ὑπό σοῦ, τῆς μορφῆς τοῦ Κυρίου, καί τῶν Ἁγίων αὐτοῦ, τῶν ἱερῶν Εἰκόνων.
Δόξα…
Ἡ τό πᾶν συνέχουσα τῷ κράτει σου, δόξα σοι, δόξα σοι, τρισυπόστατε Μονάς, Πάτερ Υἱέ καί Πνεῦμα, τούς πεποθότας εἰς σέ, ρῦσαι παντοίας βλάβης.
Καί νῦν… Θεοτοκίον
Ὡς χρυσοκαλλώπιστον λυχνίαν σε, Δέσποινα σέβομεν, τήν τό φῶς τό νοητόν, γεννήσασαν τῷ κόσμῳ, καί τήν ζοφώδη ἀχλύν, μειώσασαν Παρθένε.
Ὠδή στ΄. Ἐβόησα ἐν ὅλῃ καρδίᾳ μου...
Ἐβόησαν οἱ ἄγρυπνοι φύλακες, τῆς Ἐκκλησίας τοῦ Χριστοῦ, πρός αὐτόν αἰτοῦντες, δοθῆναι τήν εἰρήνην˙ καί εἰσήκουσε, καί προσέσχε τῇ δεήσει. (Δίς)
Διήλεγκται τοῦ πλάνου τά θήρατρα, ταῖς τῶν Πατέρων διδαχαῖς, καί Θεός ὑμνεῖται, σαρκί μεμορφωμένος, ὁ ἀπερίγραπτος, τῇ Θεότητι ὑπάρχων.
Οἱ συνεργοί τῆς πλάνης αἰσχύνεσθε, καί ἀπολέσθωσαν ὁμοῦ, σύν τῷ Ἀντωνίῳ, Θεόδοτος καί Λῆζιξ, καί Θεόδωρος, ὁ βυθός τῆς ἀπωλείας.
Τό στόμα σου διήνοιξας ἄθλιε, οὐκ ἐν ὠδαῖς πνευματικαΐς, ἀλλ' ἐν βλασφημίαις, κατά τοῦ σοῦ Δεσπότου, ἀπωθούμενος, τήν σεπτήν Εἰκονουργίαν.
Διέστρεψας Πάτερων τά δόγματα, καί Ἀποστόλων διδαχάς, ἀλληνάλλως γράφων, κατά τήν σήν θρησκείαν, τήν παράνομον, Ἰωάννη χριστομάχε.
Σοῦ ὁ καπνός δακρύων ἐνεπλησε, τῶν εὐσεβούντων ὀφθαλμούς˙ ἀλλά τῷ ἀνέμῳ, τῶν θείων Διδασκάλων, διεσκέδασται, ματαιόφρων Ἰωάννη.
Σύ τήν στολήν τήν θείαν διέρρηξας, ὥσπερ ὁ Ἄρειος τό πρίν, τόν Χριστοῦ Χιτῶνα˙ διό τῆς Ἐκκλησίας, πόρρω βεβλησαι, ἐκβληθείς καθάπερ κύων.
Δόξα…
Μίαν ἀρχήν δοξάζω Θεότητος, ἐν ὑποστάσεσι τρισίν˙ εἷς Θεός γάρ ἐστι, Πατήρ, Υἱός καί Πνεῦμα, κἄν διήρηται, χαρακτῆρσι καί προσώποις.
Καί νῦν... Θεοτοκίον
Προφητικῶς Ἁγνή θεοδοξαστε, πόλις ἐδείχθης τοῦ Θεοῦ, ἐξ ἧς ἐγενννήθη, αὐτός ὁ Ποιητής σου, μετά τόκον σε, ὡς τό πρίν διαφυλάξας.
Ὠδή ζ΄. Ἡμάρτομεν, ἠνομήσαμεν...
Τήν κάμινον τῆς αἱρέσεως νῦν κατέσβεσεν ἡ θεία χάρις, φλέγουσα νοουμένους Χαλδαίους, καί δροσίζουσα, Τριάδος θεράποντας, τετραπλαῖς ἑβδομάδεσιν ἐτῶν, αὐτήν διακρατήσασαν. (Δίς)
Πεποίκιλται, περιβέβληται, κεκαλλώπισται ἡ Ἐκκλησία, μόρφωσιν τοῦ Δεσπότου τῶν ὅλων, τῆς σαρκώσεως, καί τῶν παθημάτων αὐτοῦ, καί τά σύμβολα φέρουσα εἰς τέλος, κατά τούς θείους θεσμούς.
Ἑόρταζε, πανηγύριζε, ὁ χριστώνυμος λαός Κυρίου, βλέπων τήν Ἐκκλησίαν καί πάλιν, διαλάμπουσαν τό κάλλος τῆς θείας μορφῆς˙ ἥν Θεός ὤν ἐφόρεσεν, ὡς ἄνθρωπος, διά τό σῶσαι ἡμᾶς.
Ἐπτώχευσε, καί ἐπείνασε, καί ἐδίψησε σαρκί ὁ Λόγος, ταῦτα τῆς ἀνθρωπίνης οὐσίας, ἰδιώματα, δι’ ὧν περιγράφεται˙ οὗτος δέ τῇ Θεότητι, ἁπλοῦς ἐστι, καί ἀπερίγραπτος.
Κατήργηται, τά τεράστια, καί μαντεύματα τοῦ χριστομάχου˙ ἴσος γάρ τῶν Ἑλλήνων ἐδείχθη, ὑψαυχούμενος, τοῖς τούτων συγγράμμασιν, ἅ δικαίως ἐλίκμησαν καθάπαν, αἱ τῶν δικαίων φωναί.
Τά κρύφια, καί παμβέβηλα, καί ψυχώλεθρα διδάγματά σου, ποία ἐκδιηγήσεται γλῶσσα; ἤ τήν πρόρρησιν, τῆς ἐγγαστριμύθου σου, Ἰωάννη ψευδώνυμε, καί πρόδρομε τοῦ ἀντιχρίστου Σατάν;
Οὐκ ἔδει σε, ὦ παράνομε, ὀνομάζεσθαι τοιαύτην κλῆσιν, μᾶλλον δέ Πυθαγόραν καί Κρόνον, καί Ἀπόλλωνα, ἤ τινά τῶν ἄλλων Θεῶν˙ ὧν τόν βίον ἐζήλωσας, τερπόμενος, ταῖς ἀσελγείαις αὐτῶν.
Δόξα...
Αΐδιον, παντοδύναμον, ἀκατάληπτον πιστοί Τριάδα, πάντες Πατέρα Υἱόν, καί Πνεῦμα προσκυνήσωμεν, καί θεολογήσωμεν, ἀσυγχύτως κραυγάζοντες˙ Ἅγιος, Ἅγιος, Ἅγιος, εἶ ὁ Θεός.
Καί νῦν... Θεοτοκίον
Πανύμνητε, πολυδόξαστε, Μητροπάρθενε Θεοκυῆτορ, λύτρωσαι χαλεπῶν ἐγκλημάτων, τούς τιμῶντάς σου, τήν ἄχραντον κύησιν˙ οὐ γάρ ἄλλην βοήθειαν κεκτήμεθα, πλήν σου Θεόνυμφε.
Ὠδή η΄. Ὅν Στρατιαί Οὐρανῶν...
Προφητικῶς, ἀγαλλιασώμεθα, καί εὐφρανθῶμεν πιστοί, πάντες μυστικῶς˙ αὕτη γάρ ἡ ἡμερα, ἐν ᾗ Χριστός ὁ Λόγος, τήν ἰδίαν στολήν, ἀπεδωκε τῇ Ἐκκλησίᾳ. (Δίς)
Πολεμικῶς, ὥσπερ παρετάξαντο, κατά Χριστοῦ τῆς μορφῆς, ὁμοθυμαδόν, Λῆζιξ καί Ἰωάννης, τό ζεῦγος τοῦ Βελίαρ, πελέκει τῆς κακίας, ἐγκόψαντες τήν Ἐκκλησίαν.
Τίς μή θρηνήσῃ, τό μέγα τόλμημα, τήν θείαν βλέπων Μορφήν, τήν ἐν τῇ Χαλκῇ, πύλῃ τοῦ παλατίου, ὑπό ἀνδρῶν ἀνόμων, λίθοις βαλλομένην, τῇ διδαχῇ τοῦ Ἰωάννου;
Πῶς οὐ συνῆκας, τυφλέ πανάθλιε, ἐσκοτισμένε τόν νοῦν, τήν ὑπ’οὐρανόν, βλέπων κεκοσμημένην, Χριστοῦ τῷ χαρακτῆρι, ἀλλά μόνος ἔσχες, τό φρόνημα τῶν Ἰουδαίων;
Σύ παντελῶς, καθελεῖν ἐνόμισας, τῶν θείων Ἐκκλησιῶν, τήν σαρκολαμπῆ, Μόρφωσιν τοῦ Κυρίου, καί τῶν Ἁγίων πάντων˙ ἀλλ’ ἡ θεία χάρις, κάθεῖλε σου τήν τυραννίδα.
Τά ἱερά, τῶν Ἁγίων Λείψανα, καί τάς Εἰκόνας αὐτῶν, Λῆζιξ ὁ δεινός, ἅμα τῷ Ἰωάννῃ, οὐδόλως προσκυνεῖσθαι, ἔφασκον ἀνόμως, οἱ ἀρνηταί τῆς εὐσέβειας.
Δόξα...
Παντουργικήν, Θεαρχίαν σέβοντες, ἐν χαρακτῆρσι τρισί, πάντες εὐσεβῶς, ἄναρχον τόν Πατέρα, συνάναρχον τόν Λόγον, Πνεῦμα συνεκλάμπον, δοξάσωμεν εἰς τούς αἰῶνας.
Καί νῦν… Θεοτοκίον
Χριστιανῶν, ἡ βεβαία γέφυρα, τό καύχημα τῶν πιστῶν, καί καταφυγή, Δέσποινα Θεοτόκε, αὐτή ὑπάρχεις μόνη, πάντας βοηθοῦσα, καί σώζουσα ἐκ τῶν κινδύνων.
Ὠδή θ΄. Ἀσπόρου συλλήψεως…
Τά ἔθνη κροτήσατε, χοροί Πατέρων σπεύσατε, οἰ Ἀσκηταί δέ, καί οἱ ἐν τοῖς ὄρεσι, συνέλθετε ἥκετε, οἱ διωχθέντες πάλαι, ἀπό τοῦ πλάνου καί δυσσεβοῦς, Ἰωάννου στηλιτεῦσαι, τάς μαγείας καί μαντεύματα. (Δίς)
Εὐφραίνου ἡ ἔρημος, καί Οἰκουμένη ἅπασα, τά ὄρη πάντα, γλυκασμόν σταλάξατε, βουνοί ἀγαλλιᾶσθε, ὅτι Χριστός ὁ Λόγος, εἰρήνην ἔδωκε τοῖς ἐν γῇ, καί ταῖς θείαις Ἐκκλησίαις, τήν ἑνότητα τῆς Πίστεως.
Θεός ἐκδικήσεων, νῦν ἐπαρρησιάσατο, Χριστός ἐπέστη, ἐνισχύων σήμερον, τούς θείους Διδασκάλους, ἐν παρρησίᾳ λέγειν, τήν συγκατάβασιν αὐτοῦ, καί τήν σάρκωσιν βεβαίως, ἐν εἰκόνι περιγράφεσθαι.
Μακρόθυμε Κύριε, ὡς θαυμαστά τά ἔργα σου! τίς ἀριθμήσει, τήν φιλανθρωπίαν σου; πῶς βλέπων κτεινομένους, διά τήν σήν Εἰκόνα, τούς Ἱερεῖς σου, καί Ἀσκητάς, οὐ κατέφλεξας τούς πλάνους, ἀλλ’ ἠνέσχου ὑβριζόμενος;
Ὁ πήξας ἀσάλευτον, τήν Ἐκκλησίαν Κύριε, καί πύλαι Ἅδου, ταύτης οὐ κατίσχυσαν˙ αὐτός τήν εἰρήνην σου, παράσχου τῷ λαῷ σου˙ ἵνα σέ πάντες εἰλικρινῶς, ἐν μιᾷ δοξολογίᾳ, προσκυνῶμεν, καί δοξάζωμεν.
Ἀνάθεμα ἔστωσαν, οἱ μή τιμῶντες Δέσποτα, τόν χαρακτῆρα, τῆς σῆς σωματώσεως, πρό πάντων Ἰωάννης, ἅμα σύν Ἀντωνίῳ, καί Θεοδώρῳ τῷ δυσσεβεῖ, Θεοδότῳ καί τοῖς ἄλλοις, τοῖς ἀλάστορσι τῆς Πίστεως.
Ὁ δοῦς τήν εἰρήνην σου, τοῖς Ἀποστόλοις Δέσποτα, καί νῦν παράσχου, σήν γαλήνην ἅπασι, συνάγων τῇ χειρί σου, τούς διεσκορπισμένους, καί ὥσπερ πρόβατα λογικά, συναρίθμησον τῇ μάνδρᾳ, τῆς ἁγίας Ἐκκλησίας σου.
Δόξα...
Δοξάζω Θεότητα, Πατρός Υἱοῦ καί Πνεύματος, τήν μίαν φυσιν, τρισίν ὑποστάσεσιν, οὐσίαν ἀμέριστον, διαιρετήν προσώποις, ὁμοβασίλειον παντουργόν, πανσθενῆ τελεταρχίαν, τήν συνέχουσαν τά σύμπαντα.
Καί νῦν... Θεοτοκίον
Ἡ πάντων βοήθεια, καί σκέπη καί ἀντίληψις, Θεοκυήτορ, δεῖξον ὅτι δύνασαι, πρεσβεύειν ὑπέρ πάντων, εἰς σέ καταφευγόντων, καί ἀπελαύνεις τούς δυσσεβεῖς, τῇ δυνάμει τοῦ Υἱοῦ σου˙ ὡς γάρ Μήτηρ πάντα δύνασαι.
Καί ὅτε φθάσωμεν εἰς τόν ὡρισμένον τόπον, λέγομεν τό Τροπάριον.
Τὴν ἄχραντον Εἰκόνα σου προσκυνοῦμεν Ἀγαθέ, αἰτούμενοι συγχώρησιν τῶν πταισμάτων ἡμῶν, Χριστὲ ὁ Θεός, βουλήσει γὰρ ηὐδόκησας σαρκὶ ἀνελθεῖν ἐν τῷ Σταυρῷ, ἵνα ῥύσῃ οὓς ἔπλασας ἐκ τῆς δουλείας τοῦ ἐχθροῦ, ὅθεν εὐχαρίστως βοῶμέν σοι, Χαρᾶς ἐπλήρωσας τὰ πάντα, ὁ Σωτὴρ ἡμῶν, παραγενόμενος εἰς τὸ σῶσαι τὸν Κόσμον.
Δόξα… Καί νῦν… Ἕτερον. Ἦχος β’.
Καί ό χορός τῶν Προφητῶν, μετά Μωσῆ, καί Ἀαρών, εὐφροσύνῃ εὐφραίνεται σήμερον˙ ὅτι πέρας τῆς προφητείας προαγαγών, λάμπει ὁ Σταυρός, ἐν ᾧ ἡμᾶς ἔσωσας. Αὐτῶν ταῖς ἱκεσίαις Χριστέ ὁ Θεός, σῶσον τάς ψυχάς ἡμῶν.
ΣΥΝΟΔΙΚΟΝ ΤΗΣ ΑΓΙΑΣ ΚΑΙ ΟΙΚΟΥΜΕΝΙΚΗΣ Ζ΄ ΣΥΝΟΔΟΥ ΥΠΕΡ ΤΗΣ ΟΡΘΟΔΟΞΙΑΣ
ΠΡΟΟΙΜΙΟΝ
Εὐλόγησον Πάτερ.
Ἐποφειλομένη πρὸς Θεὸν ἐτήσιος εὐχαριστία καθ’ ἣν ἡμέραν ἀπελάβομεν τὴν τοῦ Θεοῦ Ἐκκλησίαν σὺν ἀποδείξει τῶν τῆς εὐσεβείας δογμάτων καὶ καταστροφῇ τῶν τῆς κακίας δυσσεβημάτων.
Προφητικαῖς ἑπόμενοι ῥήσεσιν ἀποστολικαῖς τε παραινέσεσιν εἴκοντες καὶ εὐαγγελικαῖς ἱστορίαις στοιχούμενοι, τῶν ἐγκαινίων τὴν ἡμέραν ἑορτάζομεν. ᾿Ησαΐας μὲν γάρ φησιν ἐγκαινίζεσθαι νήσους πρὸς τὸν Θεόν, τὰς ἐξ ἐθνῶν ὑπαινιττόμενος ἐκκλησίας· εἶεν δ’ ἂν ἐκκλησίαι, οὐχ αἱ τῶν ναῶν ἁπλῶς οἰκοδομαὶ καὶ φαιδρότητες, ἀλλὰ τῶν ἐν αὐταῖς εὐσεβούντων τὸ πλήρωμα, καὶ οἷς ἐκεῖνοι τὸ θεῖον ὕμνοις καὶ δοξολογίαις θεραπεύουσιν. Ὁ δὲ ἀπόστολος, αὐτὸ τοῦτο παραινῶν, «ἐν καινότητι ζωῆς περιπατῆσαι» διακελεύεται καὶ «εἴ τις ἐν Χριστῷ καινὴ κτίσις» ἀνακαινίζεσθαι. τὰ δέ γε κυριακὰ λόγια τὴν προφητικὴν δεικνύντα κατάστασιν, «ἐγένετο, φησίν, τὰ ἐγκαίνια ἐν ᾿Ιεροσολύμοις καὶ χειμὼν ἦν», εἴτε νοητὸς καθ’ ὃν τὸ τῶν Ἰουδαίων ἔθνος κατὰ τοῦ κοινοῦ σωτῆρος τὰς τῆς μιαιφονίας ἐκίνει καταιγίδας καὶ τὸν τάραχον, εἴτε καὶ ὁ τὰς σωματικὰς αἰσθήσεις τῇ τοῦ ἀέρος ἐπὶ τὸ κρυμῶδες παραλυπῶν μεταβολῇ. Γέγονε γὰρ δή, γέγονε καὶ καθ’ ἡμᾶς χειμὼν οὐχ ὁ τυχών, ἀλλ’ ὁ τῷ ὄντι τῆς μεγάλης κακίας ἐκχέων τὴν ὠμότητα, ἀλλ’ ἤνθησεν ἡμῖν τῶν χαρίτων τοῦ Θεοῦ τὸ πρωτοκαίριον ἔαρ, ἐν ᾧ καὶ τὴν εὐχαριστήριον τῶν ἐπ’ ἀγαθοῖς θερισμόν τῷ Θεῷ συνεληλύθαμεν ποιήσασθαι, ὡς ἂν φαίημεν ψαλμικώτερον· «θέρος καὶ ἔαρ σὺ ἔπλασας αὐτά, μνήσθητι ταύτης». καὶ γὰρ τοὺς ὀνειδίσαντας Κύριον ἐχθροὺς καὶ τὴν τούτου ἁγίαν προσκύνησιν ἐν ἁγίαις εἰκόσιν ἐξατιμώσαντας ἐπαρθέντας τε καὶ ὑψωθέντας τοῖς δυσσεβήμασι, κατέρραξεν αὐτοὺς ὁ τῶν θαυμασίων Θεὸς καὶ τὸ τῆς ἀποστασίας φρύαγμα κατηδάφισεν, οὐδὲ παρεῖδε τὴν φωνὴν τῶν βοώντων πρὸς αὐτόν· «μνήσθητι, Κύριε, τοῦ ὀνειδισμοῦ τῶν δούλων σου, οὗ ὑπέσχον ἐν τῷ κόλπῳ μου πολλῶν ἐθνῶν· οὗ ὠνείδισαν οἱ ἐχθροί σου, Κύριε, οὗ ὠνείδισαν τὸ ἀντάλλαγμα τοῦ Χριστοῦ σου». Ἀντάλλαγμα δ’ ἂν εἶεν τοῦ Χριστοῦ οἱ τῷ θανάτῳ αὐτοῦ ἐξαγορασθέντες καὶ πεπιστευκότες αὐτῷ διά τε λόγων ἀνακηρύξεως καὶ εἰκονικῆς ἀνατυπώσεως, δι’ ὧν τὸ μέγα τῆς οἰκονομίας ἔργον τοῖς λελυτρωμένοις ἐπιγινώσκεται, διὰ σταυροῦ τε καὶ τῶν πρὸ τοῦ σταυροῦ καὶ μετὰ τὸν σταυρὸν παθῶν τε καὶ θαυμάτων αὐτοῦ· ἐξ ὧν καὶ ἡ τῶν αὐτοῦ παθημάτων μίμησις εἰς ἀποστόλους, ἐκεῖθέν τε εἰς μάρτυρας διαβαίνει, καὶ δι’ αὐτῶν μέχρις ὁμολογητῶν καὶ ἀσκητῶν κάτεισι.
Τούτου τοίνυν τοῦ ὀνειδισμοῦ, «οὗ ὠνείδισαν οἱ ἐχθροὶ Κυρίου, οὗ ὠνείδισαν τὸ ἀντάλλαγμα τοῦ χριστοῦ αὐτοῦ», ἐπιμνησθεὶς ὁ Θεὸς ἡμῶν ὁ τοῖς ἰδίοις σπλάγχνοις παρακαλούμενος καὶ ταῖς μητρικαῖς αὐτοῦ δεήσεσιν ἐπικαμπτόμενος, ἔτι δὲ καὶ ἀποστολικαῖς καὶ πάντων τῶν ἁγίων, οἳ συνεξυβρίσθησαν αὐτῷ καὶ συνεξουθενώθησαν ἐν ταῖς εἰκόσιν, ἵνα, ὥς περ συνέπαθον σαρκί, οὕτως ἄρα, ὡς ἔοικε, καὶ ταῖς κατὰ τῶν σεπτῶν εἰκόνων αὐτῷ συγκοινωνήσωσιν ὕβρεσιν, ἐνήργησεν ὕστερον ὅ τι βεβούληται σήμερον, καὶ πέπραχε δεύτερον ὅ περ ἐτέλεσε πρότερον. πρότερον μὲν γάρ, μετὰ πολυετῆ τινα χρόνον τῆς τῶν ἁγίων εἰκόνων ἐκφαυλίσεως καὶ ἀτιμίας, ἐπανέστρεψε τὴν εὐσέβειαν εἰς ἑαυτήν· νυνὶ δέ, ὅ περ ἐστὶ δεύτερον, μικροῦ μετὰ τριάκοντα ἔτη κακώσεως, κατηρτίσατο τοῖς ἀναξίοις ἡμῖν τὴν τῶν δυσχερῶν ἀπαλλαγὴν καὶ τῶν λυπούντων τὴν ἀπολύτρωσιν καὶ τῆς εὐσεβείας τὴν ἀνακήρυξιν καὶ τῆς εἰκονικῆς προσκυνήσεως τὴν ἀσφάλειαν καὶ τὴν πάντα φέρουσαν ἡμῖν τὰ σωτήρια ἑορτήν. ἐν γὰρ ταῖς εἰκόσιν ὁρῶμεν τὰ ὑπὲρ ἡμῶν τοῦ δεσπότου πάθη, τὸν σταυρόν, τὸν τάφον, τὸν ᾅδην νεκρούμενον καὶ σκυλευόμενον, τῶν μαρτύρων τοὺς ἄθλους, τοὺς στεφάνους, αὐτὴν τὴν σωτηρίαν, ἣν ὁ πρῶτος ἡμῶν ἀθλοθέτης καὶ ἀθλοδότης καὶ στεφανίτης «ἐν μέσῳ τῆς γῆς κατειργάσατο». ταύτην σήμερον τὴν πανήγυριν ἑορτάζομεν, ἐν ταύτῃ εὐχαῖς καὶ λιτανείαις συνευφραινόμενοί τε καὶ συναγαλλόμενοι, ψαλμοῖς ἐκβοῶμεν καὶ ᾄσμασιν.
Ἔξω
Τίς θεὸς μέγας ὡς ὁ Θεὸς ἡμῶν; σὺ εἶ ὁ Θεὸς ἡμῶν ὁ ποιῶν θαυμάσια μόνος. (Τρίς)
Τοὺς φαυλιστὰς γὰρ τῆς σῆς δόξης ἐξεμυκτήρισας, τοὺς τολμητὰς κατὰ τῆς εἰκόνος καὶ θρασεῖς, δειλοὺς καὶ πεφευγότας ἀπέδειξας.
Ἀλλ’ ἡ μὲν εἰς Θεὸν εὐχαριστία καὶ τὸ δεσποτικὸν κατὰ τῶν ἀντιπάλων τρόπαιον ἐν τούτοις· τὰ δέ γε κατὰ τῶν εἰκονομαχούντων ἆθλά τε καὶ παλαίσματα ἕτερος λόγος καὶ λογογραφία διεξοδικωτέρα δηλώσει. ὡς ἐν καταπαύσει δέ τινι τῇ μετὰ τὴν ἐρημικὴν πάροδον, εἰς κατάσχεσιν τῆς νοητῆς ᾿Ιερουσαλὴμ καθεστῶτες, μωσαϊκῇ τινι μιμήσει, μᾶλλον δὲ θεϊκῇ διακελεύσει, οἷα στήλῃ τινὶ ἐκ μεγίστων λίθων συνηρμοσμένῃ καὶ πρὸς ἀποδοχὴν γραφῆς διατιθεμένῃ, ταῖς τῶν ἀδελφῶν καρδίαις τάς τε εὐλογίας αἳ ὀφείλονται τοῖς νομοφυλακτοῦσι καὶ τὰς ἀρὰς δὲ αἷς ἑαυτοὺς ὑποβάλλουσιν οἱ παρανομοῦντες, δίκαιόν τε καὶ ὀφειλόμενον δεῖν ᾠήθημεν ἀναγράψαι. Δι᾿ ὃ φαμὲν τάδε.
Τῶν τὴν ἔνσαρκον τοῦ Θεοῦ Λόγου παρουσίαν λόγῳ, στόματι, καρδίᾳ καὶ νοΐ, γραφῇ τε καὶ εἰκόσιν ὁμολογούντων, Αἰωνία ἡ μνήμη (γ΄).
Τῶν εἰδότων τῆς τοῦ Χριστοῦ μιᾶς καὶ τῆς αὐτῆς ὑποστάσεως τὸ ἐν οὐσίαις διάφορον καὶ ταύτης τὸ κτιστόν τε καὶ ἄκτιστον, τὸ ὁρατὸν καὶ ἀόρατον, τὸ παθητὸν καὶ ἀπαθές, τὸ περιγραπτὸν καὶ ἀπερίγραπτον, καὶ τῇ μὲν θεϊκῇ οὐσίᾳ τὸ ἄκτιστον καὶ τὰ ὅμοια προσαρμοζόντων, τῇ δὲ ἀνθρωπίνῃ φύσει τά τε ἄλλα καὶ τὸ περιγραπτὸν ἀνομολογούντων καὶ λόγῳ καὶ εἰκονίσμασιν, Αἰωνία ἡ μνήμη (γ΄).
Τῶν πιστευόντων καὶ διακηρυκευομένων ἤτοι εὐαγγελιζομένων τοὺς λόγους ἐπὶ γραμμάτων, τὰ πράγματα ἐπὶ σχημάτων, καὶ εἰς μίαν ἑκάτερον συντελεῖν ὠφέλειαν, τήν τε διὰ λόγων ἀνακήρυξιν καὶ τὴν δι’ εἰκόνων τῆς ἀληθείας βεβαίωσιν, Αἰωνία ἡ μνήμη (γ΄).
Τῶν τῷ λόγῳ ἁγιαζόντων τὰ χείλη, εἶτα τοὺς ἀκροατὰς διὰ τοῦ λόγου, εἰδότων τε καὶ κηρυσσόντων ὡς ἁγιάζεται μὲν ὁμοίως διὰ τῶν σεπτῶν εἰκόνων τὰ ὄμματα τῶν ὁρώντων, ἀνάγεται δὲ δι’ αὐτῶν ὁ νοῦς πρὸς θεογνωσίαν, ὥς περ καὶ διὰ τῶν θείων ναῶν καὶ τῶν ἱερῶν σκευῶν καὶ τῶν ἄλλων κειμηλίων, Αἰωνία ἡ μνήμη (γ΄).
Τῶν ἐπισταμένων ὡς ἡ ῥάβδος καὶ αἱ πλάκες, ἡ κιβωτὸς καὶ ἡ λυχνία καὶ ἡ τράπεζα καὶ τὸ θυμιατήριον τὴν παναγίαν προέγραφέ τε καὶ προδιετύπου παρθένον τὴν θεοτόκον Μαρίαν, καὶ ὡς ταῦτα μὲν προετύπου ταύτην, οὐ γέγονε δὲ ἐκείνη ταῦτα, γέγονε δὲ κόρη καὶ διαμένει μετὰ τὴν θεογεννησίαν παρθένος, καὶ διὰ τοῦτο μᾶλλον κόρην αὐτὴν τοῖς εἰκονίσμασι γραφόντων ἢ τοῖς τύποις σκιαγραφούντων, Αἰωνία ἡ μνήμη (γ΄).
Τῶν τὰς προφητικὰς ὁράσεις, ὡς αὐτὸ τὸ θεῖον αὐτὰς ἐσχημάτιζε καὶ διετύπου, εἰδότων καὶ ἀποδεχομένων καὶ πιστευόντων ἅ περ ὁ τῶν προφητῶν χορὸς ἑωρακότες διηγήσαντο, καὶ τὴν διά τῶν ἀποστόλων καὶ εἰς Πατέρας διήκουσαν ἔγγραφόν τε καὶ ἄγραφον παράδοσιν κρατυνόντων, καὶ διὰ τοῦτο εἰκονιζόντων τὰ ἅγια καὶ τιμώντων, Αἰωνία ἡ μνήμη (γ΄).
Τῶν συνιέντων Μωσέως λαλοῦντος· «προσέχετε ἑαυτοῖς ὅτι τῇ ἡμέρᾳ ᾗ ἐλάλησε Κύριος ὁ Θεὸς ἐν Χωρὴβ ἐπὶ τοῦ ὄρους, φωνὴν ῥημάτων ὑμεῖς ἠκούσατε, ὁμοίωμα δὲ οὐκ εἴδετε», καὶ εἰδότων ἀποκριθῆναι ὀρθῶς· εἰ δὲ εἴδομέν τι, ἀληθῶς δὲ εἴδομεν, ὡς ὁ τῆς βροντῆς υἱὸς ἡμᾶς ἐδίδαξεν· «ὃ ἦν ἀπ’ ἀρχῆς, ὃ ἀκηκόαμεν, ὃ ἑωράκαμεν, ὃ ἐθεασάμεθα τοῖς ὀφθαλμοῖς ἡμῶν καὶ αἱ χεῖρες ἡμῶν ἐψηλάφησαν, περὶ τοῦ Λόγου τῆς ζωῆς, καὶ ταῦτα μαρτυροῦμεν», καὶ πάλιν ὡς οἱ ἄλλοι τοῦ Λόγου μαθηταί· «καὶ συνεφάγομεν αὐτῷ καὶ συνεπίομεν», οὐ πρὸ τοῦ πάθους μόνον, ἀλλὰ καὶ μετὰ τὸ πάθος καὶ τὴν ἀνάστασιν· τῶν γοῦν διαστέλλειν θεόθεν δυναμωθέντων τὴν ἐν τῷ νόμῳ παραγγελίαν καὶ τὴν ἐν χάριτι διδασκαλίαν, καὶ τὸ ἐν ἐκείνῳ μὲν ἀόρατον, ἐν ταύτῃ δὲ καὶ ὁρατὸν καὶ ψηλαφητόν, καὶ διὰ τοῦτο τὰ ὁραθέντα τε καὶ ψηλαφηθέντα εἰκονογραφούντων καὶ προσκυνούντων, Αἰωνία ἡ μνήμη (γ΄).
Οἱ προφῆται ὡς εἶδον, οἱ ἀπόστολοι ὡς ἐδίδαξαν, ἡ ἐκκλησία ὡς παρέλαβεν, οἱ διδάσκαλοι ὡς ἐδογμάτισαν, ἡ οἰκουμένη ὡς συμπεφρόνηκεν, ἡ χάρις ὡς ἔλαμψεν, ἡ ἀλήθεια ὡς ἀποδέδεικται, τὸ ψεῦδος ὡς ἀπελήλαται, ἡ σοφία ὡς ἐπαρρησιάσατο, ὁ Χριστὸς ὡς ἐβράβευσεν· οὕτω φρονοῦμεν, οὕτω λαλοῦμεν, οὕτω κηρύσσομεν, Χριστὸν τὸν ἀληθινὸν Θεὸν ἡμῶν καὶ τοὺς αὐτοῦ ἁγίους ἐν λόγοις τιμῶντες, ἐν συγγραφαῖς, ἐν νοήμασιν, ἐν θυσίαις, ἐν ναοῖς, ἐν εἰκονίσμασι, τὸν μὲν ὡς Θεὸν καὶ δεσπότην προσκυνοῦντες καὶ σέβοντες, τοὺς δὲ διὰ τὸν κοινὸν δεσπότην ὡς αὐτοῦ γνησίους θεράποντας τιμῶντες καὶ τὴν κατὰ σχέσιν προσκύνησιν ἀπονέμοντες.
Αὕτη ἡ πίστις τῶν ἀποστόλων, αὕτη ἡ πίστις τῶν πατέρων, αὕτη ἡ πίστις τῶν ὀρθοδόξων, αὕτη ἡ πίστις τὴν οἰκουμένην ἐστήριξεν.
Ἐπὶ τούτοις τοὺς τῆς εὐσεβείας κήρυκας ἀδελφικῶς τε καὶ πατροποθήτως, εἰς δόξαν καὶ τιμὴν τῆς εὐσεβείας ὑπὲρ ἧς ἠγωνίσαντο, ἀνευφημοῦμεν καὶ λέγομεν.
Χαμαί. Γερμανοῦ, Ταρασίου, Νικηφόρου καὶ Μεθοδίου τῶν ὡς ἀληθῶς ἀρχιερέων Θεοῦ καὶ τῆς ὀρθοδοξίας προμάχων καὶ διδασκάλων, Αἰωνία ἡ μνήμη (γ΄).
Ἰγνατίου, Φωτίου, Στεφάνου, Ἀντωνίου καὶ Νικολάου τῶν ἁγιωτάτων καὶ ὀρθοδόξων πατριαρχῶν, Αἰωνία ἡ μνήμη (γ΄).
Ἅπαντα τὰ κατὰ τῶν ἁγίων πατριαρχῶν Γερμανοῦ, Ταρασίου, Νικηφόρου καὶ Μεθοδίου, Ἰγνατίου, Φωτίου, Νικηφόρου, Ἀντωνίου, καὶ Νικολάου γραφέντα ἢ λαληθέντα, Ἀνάθεμα (γ΄).
Ἅπαντα τὰ παρὰ τὴν ἐκκλησιαστικὴν παράδοσιν καὶ τὴν διδασκαλίαν καὶ ὑποτύπωσιν τῶν ἁγίων καὶ ἀοιδίμων πατέρων καινοτομηθέντα ἢ μετὰ τοῦτο πραχθησόμενα, Ἀνάθεμα (γ΄).
Στεφάνου τοῦ ὁσιομάρτυρος καὶ ὁμολογητοῦ τοῦ νέου, Αἰωνία ἡ μνήμη (γ΄).
Εὐθυμίου, Θεοφίλου καὶ Αἰμιλιανοῦ, τῶν ἀοιδίμων ὁμολογητῶν καὶ ἀρχιεπισκόπων, Αἰωνία ἡ μνήμη (γ΄).
Θεοφυλάκτου, Πέτρου, Μιχαὴλ καὶ Ἰωσήφ, τῶν μακαρίων μητροπολιτῶν, Αἰωνία ἡ μνήμη (γ΄).
Ἰωάννου, Νικολάου καὶ Γεωργίου, τῶν τρισολβίων ὁμολογητῶν καὶ ἀρχιεπισκόπων, καὶ πάντων τῶν ὁμοφρονησάντων αὐτοῖς ἐπισκόπων, Αἰωνία ἡ μνήμη (γ΄).
Θεοδώρου τοῦ πανοσίου ἡγουμένου τοῦ Στουδίτου, Αἰωνία ἡ μνήμη (γ΄).
Ἰσαακίου τοῦ θαυματουργοῦ καὶ Ἰωαννικίου τοῦ προφητικωτάτου, Αἰωνία ἡ μνήμη (γ΄).
Ἱλαρίωνος τοῦ ὁσιωτάτου ἀρχιμανδρίτου καὶ ἡγουμένου τῶν Δαλμάτων, Αἰωνία ἡ μνήμη (γ΄).
Συμεὼν τοῦ ὁσιωτάτου στυλίτου, Αἰωνία ἡ μνήμη (γ΄).
Θεοφάνους τοῦ ὁσιωτάτου ἡγουμένου τοῦ μεγάλου Ἀγροῦ, Αἰωνία ἡ μνήμη (γ΄).
Αὗται ὡς εὐλογίαι πατέρων ἀπ’ αὐτῶν εἰς ἡμᾶς τοὺς υἱοὺς ζηλοῦντας αὐτῶν τὴν εὐσέβειαν διαβαίνουσιν· ὡσαύτως δὲ καὶ αἱ ἀραὶ τοὺς πατραλοίας καὶ τῶν δεσποτικῶν ἐντολῶν ὑπερόπτας καταλαμβάνουσι· δι᾿ ὃ κοινῇ πάντες, ὅσον εὐσεβείας πλήρωμα, οὕτως αὐτοῖς τὴν ἀρὰν ἣν αὐτοὶ ἑαυτοὺς ὑπεβάλοντο ἐπιφέρομεν, Αἰωνία ἡ μνήμη (γ΄).
Τοῖς λόγῳ μὲν τὴν ἔνσαρκον οἰκονομίαν τοῦ Θεοῦ Λόγου δεχομένοις, ὁρᾶν δὲ ταύτην δι’ εἰκόνων οὐκ ἀνεχομένοις, καὶ διὰ τοῦτο ῥήματι μὲν κατασχηματιζομένοις, πράγματι δὲ τὴν σωτηρίαν ἡμῶν ἀρνουμένοις, Ἀνάθεμα (α΄).
Τοῖς τῷ ῥήματι τοῦ ἀπεριγράπτου κακῶς προσφυομένοις, καὶ διὰ τοῦτο μὴ βουλομένοις εἰκονογραφεῖσθαι τὸν παραπλησίως ἡμῖν σαρκὸς καὶ αἵματος κεκοινωνηκότα Χριστὸν τὸν ἀληθινὸν Θεὸν ἡμῶν, καὶ ἐντεῦθεν φαντασιασταῖς δεικνυμένοις, Ἀνάθεμα (α΄).
Τοῖς τὰς μὲν προφητικὰς ὁράσεις, κἂν μὴ βούλοιντο, παραδεχομένοις, τὰς δ’ ὀφθείσας αὐτοῖς εἰκονογραφίας –ὢ θαῦμα!– καὶ πρὸ σαρκώσεως τοῦ Λόγου μὴ καταδεχομένοις, ἀλλ’ ἢ αὐτὴν τὴν ἄληπτόν τε καὶ ἀθέατον οὐσίαν ὀφθῆναι τοῖς τεθεαμένοις κενολογοῦσιν, ἢ εἰκόνας μὲν ταῦτα τῆς ἀληθείας καὶ τύπους καὶ σχήματα ἐμφανισθῆναι τοῖς ἑωρακόσι συντιθεμένοις, εἰκονογραφεῖν δὲ ἐνανθρωπήσαντα τὸν Λόγον καὶ τὰ ὑπὲρ ἡμῶν αὐτοῦ πάθη οὐκ ἀνεχομένοις, Ἀνάθεμα (α΄).
Τοῖς ἀκούουσι τοῦ Κυρίου ὡς «εἰ ἐπιστεύετε Μωϋσῇ, ἐπιστεύετε ἂν ἐμοὶ» καὶ τὰ ἑξῆς, καὶ τὸ «προφήτην ὑμῖν ἀναστήσει ὁ Κύριος ὁ Θεὸς ἡμῶν ὡς ἐμὲ» τοῦ Μωσέως λέγοντος, συνιοῦσιν, εἶτα λέγουσι δέξασθαι μὲν τὸν προφήτην, οὐκ εἰσάγουσι δὲ δι’ εἰκονισμάτων τὴν τοῦ προφήτου χάριν καὶ τὴν παγκόσμιον σωτηρίαν, ὡς ὡράθη, ὡς συνανεστράφη ἀνθρώποις, ὡς πάθη καὶ νόσους ἰάσεως μείζονας ἐθεράπευσεν, ὡς ἐσταυρώθη, ὡς ἐτάφη, ὡς ἀνέστη, ὡς πάντα τὰ ὑπὲρ ἡμῶν ἔπαθέ τε καὶ ἐποίησε· τοῖς οὖν ταῦτα τὰ παγκόσμια καὶ σωτήρια ἔργα ἐν εἰκόσιν ὁρᾶν μὴ ἀνεχομένοις μηδὲ τιμῶσιν αὐτὰ καὶ προσκυνοῦσιν, Ἀνάθεμα (γ΄).
Τοῖς ἐπιμένουσι τῇ εἰκονομάχῳ αἱρέσει, μᾶλλον δὲ τῇ χριστομάχῳ ἀποστασίᾳ, καὶ μήτε διὰ τῆς μωσαϊκῆς νομοθεσίας πρὸς τὴν σωτηρίαν αὐτῶν ἀναχθῆναι βουλομένοις μήτε ταῖς ἀποστολικαῖς διδασκαλίαις ἐναστραφθῆναι τὴν εὐσέβειαν προαιρουμένοις μήτε ταῖς πατρικαῖς παραινέσεσι καὶ εἰσηγήσεσι τῆς πλάνης αὐτῶν ἐπιστραφῆναι πειθομένοις μήτε τῇ συμφωνίᾳ τῶν ἀνὰ πᾶσαν τὴν οἰκουμένην ἐκκλησιῶν τοῦ Θεοῦ δυσωπουμένοις, ἀλλ’ ἐφ’ ἅπαξ ἑαυτοὺς τῇ τῶν Ἰουδαίων καὶ ῾Ελλήνων μερίδι καθυποβαλλομένους· ἃ γὰρ ἀμέσως ἐκεῖνοι εἰς τὸ πρωτότυπον βλασφημοῦσι, καὶ οὗτοι διὰ τῆς αὐτοῦ εἰκόνος εἰς αὐτὸν ἐκεῖνον τὸν εἰκονιζόμενον τολμᾶν οὐκ ἐρυθριῶσι· τοῖς οὖν ἀνεπιστρόφως τῇ πλάνῃ ταύτῃ κατεχομένοις καὶ πρὸς πάντα λόγον θεῖον καὶ πνευματικὴν διδασκαλίαν τὰ ὦτα βεβυσμένοις, ὡς ἤδη λοιπὸν σεσηπόσι καὶ τοῦ κοινοῦ σώματος τῆς Εκκλησίας ἀποτεμοῦσιν ἑαυτούς, Ἀνάθεμα (γ΄).
Τοῖς εἰσάγουσιν ἐπὶ τῆς ἀρρήτου ἐνσάρκου οἰκονομίας τοῦ Κυρίου καὶ Θεοῦ καὶ σωτῆρος ἡμῶν Ἰησοῦ Χριστοῦ καινοφωνίας τινάς, καὶ λέγουσιν ἢ φρονοῦσι προσκυνεῖν τὸ ἀνθρώπινον τοῦ Χριστοῦ τῇ ἀπροσίτῳ θεότητι δουλικῶς, καὶ τὴν δουλείαν ἀίδιον κεκτῆσθαι ὡς οὐσιώδη καὶ ἀναπόβλητον, Ἀνάθεμα (γ΄).
Τοῖς μὴ μετὰ πάσης εὐλαβείας χρωμένοις τῇ κατ' ἐπίνοιαν διαιρέσει πρὸς δήλωσιν μόνον τῆς ἑτερότητος τῶν ἐν Χριστῷ συνδραμουσῶν ἀρρήτως δύο φύσεων καὶ ἐν αὐτῷ ἀσυγχύτως καὶ ἀδιαιρέτως ἡνωμένων, ἀλλὰ καταχρωμένοις τῇ τοιαύτῃ διαιρέσει καὶ λέγουσι «τὸ πρόσλημμα οὐ τῇ φύσει μόνον ἕτερον, ἄλλα καὶ τῇ ἀξίᾳ» καὶ ὅτι «λατρεύει Θεῷ καὶ ὑπηρεσίαν προσφέρει δουλικὴν καὶ τιμὴν τὴν προσήκουσαν ἀπονέμει ὡς ὀφειλήν, καθά περ τὰ λειτουργικὰ πνεύματα τὰ τῷ Θεῷ ὑπηρετοῦντά τε καὶ λατρεύοντα δουλικῶς», καὶ ἰδίᾳ «τὸ πρόσλημμα ἀρχιερέα μέγιστον εἶναι» διδάσκουσι, καὶ οὐχὶ τὸν Θεὸν Λόγον ὅτι γέγονεν ἄνθρωπος, ὡς διὰ τῶν τοιούτων τὸν ἕνα Χριστὸν τὸν Κύριον ἡμῶν καὶ Θεὸν διαιρεῖν τολμῶσιν ὑποστατικῶς, Ἀνάθεμα (γ΄).
Τοῖς λέγουσιν, ὅτι τὴν ἐν τῷ καιρῷ τοῦ κοσμοσωτηρίου πάθους τοῦ Κυρίου καὶ Θεοῦ καὶ σωτῆρος ἡμῶν Ἰησοῦ Χριστοῦ προσαχθεῖσαν ὑπὲρ τῆς ἡμῶν σωτηρίας παρ' αὐτοῦ θυσίαν τοῦ τιμίου αὐτοῦ σώματός τε καὶ αἵματος, ὡς ἀρχιερέως, κατὰ τὸ ἀνθρώπινον δι' ἡμᾶς χρηματίσαντος, ὅτι περ ὁ αὐτὸς καὶ Θεὸς καὶ θύτης καὶ θῦμα, κατὰ τὸν πολὺν ἐν θεολογίᾳ Γρηγόριον, προσήγαγε μὲν αὐτὸς τῷ Θεῷ καὶ Πατρί, οὐ προσεδέξατο δὲ ὡς Θεὸς μετὰ τοῦ Πατρός, αὐτός τε ὁ μονογενὴς καὶ τὸ Πνεῦμα τὸ ἅγιον, ὡς διὰ τούτων ἀποξενοῦσιν αὐτόν τε τὸν Θεὸν Λόγον καὶ τὸ ὁμοούσιον καὶ ὁμόδοξον τούτου παράκλητον Πνεῦμα τῆς θεοπρεποῦς ὁμοτιμίας τε καὶ ἀξίας, Ἀνάθεμα (γ΄).
Τοῖς τὴν καθ' ἕκαστην προσαγομένην θυσίαν ὑπὸ τῶν παραλαβόντων ἀπὸ Χριστοῦ τὴν τῶν θείων μυστηρίων ἱερουργίαν, μὴ δεχομένοις τῇ ἁγίᾳ Τριάδι προσάγεσθαι, ὡς ἀντιφθεγγομένοις ἐντεῦθεν τοῖς ἱεροῖς καὶ θείοις πατράσι Βασιλείῳ τε καὶ Χρυσορρήμονι, οἷς συμφωνοῦσι καὶ οἱ λοιποὶ θεοφόροι πατέρες ἐν τοῖς οἰκείοις λόγοις τε καὶ συγγράμμασιν, Ἀνάθεμα (γ΄).
Τοῖς ἀκούουσι μὲν τοῦ σωτῆρος περὶ τῆς παρ' αὐτοῦ παραδοθείσης τῶν θείων μυστηρίων ἱερουργίας λέγοντος· «τοῦτο ποιεῖτε εἰς τὴν ἐμὴν ἀνάμνησιν», μὴ ἐκλαμβανομενοις δὲ ὀρθῶς τὴν ἀνάμνησιν, ἀλλὰ τολμῶσι λέγειν ὅτι καινίζει φανταστικῶς καὶ εἰκονικῶς τὴν ἐπὶ τοῦ τιμίου σταυροῦ παρὰ τοῦ σωτῆρος ἡμῶν προσαχθεῖσαν θυσίαν τοῦ ἰδίου σώματός τε καὶ αἵματος, εἰς κοινὸν τῆς ἀνθρωπίνης φύσεως λύτρον τε καὶ ἐξίλασμα, ἡ καθ' ἑκάστην προσαγομένη θυσία παρὰ τῶν τὰ θεῖα ἱερουργούντων μυστήρια, καθὼς ὁ σωτὴρ ἡμῶν καὶ δεσπότης τῶν ὅλων παρέδωκε· καὶ διὰ τοῦτο ἄλλην εἶναι ταύτην παρὰ τὴν ἐξ ἀρχῆς τῷ σωτῆρι τετελεσμένην εἰσάγουσι καὶ πρὸς ἐκείνην φανταστικῶς καὶ εἰκονικῶς ἀναφερομένην, ὡς κενοῦσι τὸ τῆς φρικτῆς καὶ θείας ἱερουργίας μυστήριον, δι' οὗ τὸν τῆς μελλούσης ζωῆς ἀρραβῶνα λαμβάνομεν, καὶ ταῦτα τοῦ θείου πατρὸς ἡμῶν Ἰωάννου τοῦ χρυσορρήμονος διατρανοῦντος τῆς θυσίας τὸ ἀπαράλλακτον καὶ μίαν καὶ τὴν αὐτὴν εἶναι φάσκοντος ἐν πολλαῖς τῶν τοῦ μεγάλου Παύλου ῥητῶν ἐξηγήσεσιν, Ἀνάθεμα (γ΄).
Τοῖς τὰς χρονικὰς διαστάσεις ἐπὶ τῆς καταλλαγῆς τῆς ἀνθρωπίνης φύσεως πρὸς τὴν θείαν καὶ μακαρίαν φύσιν τῆς ζωαρχικῆς καὶ πανακηράτου Τριάδος ἐπινοοῦσι καὶ παρεισάγουσι, καὶ πρότερον μὲν τῷ μονογενεῖ Λόγῳ νομοθετοῦσιν ἐξ αὐτῆς κατηλλάχθαι ἡμᾶς τῆς προσλήψεως, ὕστερον δὲ τῷ Θεῷ καὶ Πατρὶ κατὰ τὸ σωτήριον πάθος τοῦ σωτῆρος Χριστοῦ, καὶ διαιροῦσι τὰ ἀδιαίρετα τῶν θείων καὶ μακαρίων πατέρων διὰ τοῦ τῆς οἰκονομίας μυστηρίου παντὸς καταλλάξαι ἡμᾶς ἑαυτῷ τὸν μονογενῆ διδασκόντων, δι’ ἑαυτοῦ τε καὶ ἐν ἑαυτῷ τῷ Θεῷ καὶ Πατρί, ἀκολούθως δὲ πάντως καὶ τῷ παναγίῳ καὶ ζωοποιῷ Πνεύματι, ὡς καινῶν καὶ ἐκφύλων ἐφευρεταῖς, Ἀνάθεμα (γ΄).
Ἀναστασίῳ, Κωνσταντίνῳ καὶ Νικήτᾳ, τοῖς ἐπὶ τῶν Ἰσαύρων κατάρξασι τῶν αἱρέσεων, ὡς ἀνιέροις καὶ ὁδηγοῖς ἀπωλείας, Ἀνάθεμα (γ΄).
Θεοδότῳ, Ἀντωνίῳ καὶ Ἰωάννῃ, τοῖς ἀλληλοπροξένοις τῶν κακῶν καὶ ἑτεροδιαδόχοις τὴν δυσσέβειαν, Ἀνάθεμα (γ΄).
Παύλῳ τῷ εἰς Σαῦλον ἀποστρέψαντι καὶ Θεοδώρῳ τῷ ἐπικαλουμένῳ Γάστῃ καὶ Στεφάνῳ τῷ Μολύτῃ, ἔτι δὲ καὶ Θεοδώρῳ τῷ Κριθίνῳ καὶ Λαλουδίῳ τῷ Λέοντι, καὶ πρὸς τούτοις, εἴ τις τοῖς εἰρημένοις ὅμοιος τὴν δυσσέβειαν, ἐν ὁποίῳ ἂν εἴη καταλόγῳ κλήρου, ἀξιώματος τινὸς ἢ ἐπιτηδεύματος ἐξεταζόμενος· τούτοις ἅπασιν ἐπιμένουσιν αὐτῶν τῇ δυσσεβείᾳ, Ἀνάθεμα (γ΄).
Γεροντίῳ τῷ ἐκ Λάμπης μὲν ὁρμωμένῳ, ἐν δὲ τῇ Κρήτῃ τὸν ἰὸν τῆς αὐτοῦ μυσαρᾶς αἱρέσεως ἐξεμέσαντι καὶ ἠλειμμένον ἑαυτὸν ἀποκαλέσαντι ἐπ’ ἀνατροπῇ –φεῦ!– τῆς σωτηριώδους οἰκονομίας τοῦ Χριστοῦ σὺν τοῖς διεστραμμένοις αὐτοῦ δόγμασι καὶ συγγράμμασι καὶ τοῖς ὁμόφροσιν αὐτῷ, Ἀνάθεμα (γ΄).
Τοῦ Ἰταλοῦ Ἰωάννου. Κεφάλαιον ΙΑ΄
Τοῖς ὅλως ἐπιχειροῦσιν οἵαν δή τινα ζήτησιν καὶ διδαχὴν τῇ ἀρρήτῳ ἐνσάρκῳ οἰκονομίᾳ τοῦ σωτῆρος ἡμῶν καὶ Θεοῦ ἐπάγειν καὶ ζητεῖν οἵῳ τρόπῳ αὐτὸς ὁ Θεὸς Λόγος τῷ ἀνθρωπίνῳ φυράματι ἥνωται καὶ τὴν προσληφθεῖσαν σάρκα κατὰ τίνα λόγον ἐθέωσε, καὶ λόγοις διαλεκτικοῖς φύσιν καὶ θέσιν ἐπὶ τῆς ὑπὲρ φύσιν καινοτομίας τῶν δύο φύσεων τοῦ Θεοῦ καὶ ἀνθρώπου λογομαχεῖν πειρωμένοις, Ἀνάθεμα (γ΄).
Τοῖς εὐσεβεῖν μὲν ἐπαγγελλομένοις, τὰ τῶν Ἑλλήνων δὲ δυσσεβῆ δόγματα τῇ ὀρθοδόξῳ καὶ καθολικῇ ἐκκλησίᾳ περί τε ψυχῶν ἀνθρωπίνων καὶ οὐρανοῦ καὶ γῆς καὶ τῶν ἄλλων κτισμάτων ἀναιδῶς ἢ μᾶλλον ἀσεβῶς ἐπεισάγουσιν, Ἀνάθεμα (γ΄).
Τοῖς τὴν μωρὰν τῶν ἔξωθεν φιλοσόφων λεγομένην σοφίαν προτιμῶσι καὶ τοῖς καθηγηταῖς αὐτῶν ἑπομένοις καὶ τάς τε μετεμψυχώσεις τῶν ἀνθρωπίνων ψυχῶν ἢ καὶ ὁμοίως τοῖς ἀλόγοις ζῴοις ταύτας ἀπόλλυσθαι καὶ εἰς τὸ μηδὲν χωρεῖν δεχομένοις, καὶ διὰ τούτων ἀνάστασιν καὶ κρίσιν καὶ τὴν τελευταίαν τῶν βεβιωμένων ἀνταπόδοσιν ἀθετοῦσιν, Ἀνάθεμα (γ΄).
Τοῖς τὴν ὕλην ἄναρχον καὶ τὰς ἰδέας ἢ συνάναρχον τῷ δημιουργῷ πάντων καὶ Θεῷ δογματίζουσι, καὶ ὅτι περ οὐρανὸς καὶ γῆ καὶ τὰ λοιπὰ τῶν κτισμάτων ἀίδιά τε εἰσὶ καὶ ἄναρχα καὶ διαμένουσιν ἀναλλοίωτα, καὶ ἀντινομοθετοῦσι τῷ εἰπόντι· «ὁ οὐρανὸς καὶ ἡ γῆ παρελεύσονται, οἱ δὲ λόγοι μου οὐ μὴ παρέλθωσι», καὶ ἀπὸ γῆς κενοφωνοῦσι καὶ τὴν θείαν ἀρὰν ἐπὶ τὰς ἑαυτῶν ἄγουσι κεφαλάς, Ἀνάθεμα (γ΄).
Τοῖς λέγουσιν ὅτι οἱ τῶν Ἑλλήνων σοφοὶ καὶ πρῶτοι τῶν αἱρεσιαρχῶν, οἱ παρὰ τῶν ἑπτὰ ἁγίων καὶ καθολικῶν συνόδων καὶ παρὰ πάντων τῶν ὀρθοδοξίᾳ λαμψάντων πατέρων ἀναθέματι καθυποβληθέντες ὡς ἀλλότριοι τῆς καθολικῆς ἐκκλησίας, διὰ τὴν ἐν λόγοις αὐτῶν κίβδηλον καὶ ῥυπαρὰν περιουσίαν, κρείττονες εἰσὶ κατὰ πολὺ καὶ ἐνταῦθα καὶ ἐν τῇ μελλούσῃ κρίσει, καί τῶν εὐσεβῶν μὲν καὶ ὀρθοδόξων ἀνδρῶν, ἄλλως δὲ κατὰ πάθος ἀνθρώπινον ἢ ἀγνόημα πλημμελησάντων, Ἀνάθεμα (α΄).
Τοῖς μὴ πίστει καθαρᾷ καὶ ἁπλῇ καὶ ὁλοψύχῳ καρδίᾳ τὰ τοῦ σωτῆρος ἡμῶν καὶ Θεοῦ καὶ τῆς ἀχράντως αὐτὸν τεκούσης δεσποίνης ἡμῶν θεοτόκου καὶ τῶν λοιπῶν ἁγίων ἐξαίσια θαύματα δεχομένοις, ἀλλὰ πειρωμένοις ἀποδείξεσι καὶ λόγοις σοφιστικοῖς ὡς ἀδύνατα διαβάλλειν ἢ κατὰ τὸ δοκοῦν αὐτοῖς παρερμηνεύειν καὶ κατὰ τὴν ἰδίαν γνώμην συνιστᾶν, Ἀνάθεμα (α΄).
Τοῖς τὰ ἑλληνικὰ διεξιοῦσι μαθήματα καὶ μὴ διὰ παίδευσιν μόνον ταῦτα παιδευομένοις, ἀλλὰ καὶ ταῖς δόξαις αὐτῶν ταῖς ματαίαις ἑπομένοις καὶ ὡς ἀληθέσι πιστεύουσι, καὶ οὕτως αὐταῖς ὡς τὸ βέβαιον ἐχούσαις ἐγκειμένοις, ὥστε καὶ ἑτέρους ποτὲ μὲν λάθρᾳ ποτὲ δὲ φανερῶς ἐνάγειν αὐταῖς καὶ διδάσκειν ἀνενδοιάστως, ἀνάθεμα (α΄).
Τοῖς μετὰ τῶν ἄλλων μυθικῶν πλασμάτων ἀφ’ ἑαυτῶν καὶ τὴν καθ’ ἡμᾶς πλάσιν μεταπλάττουσι καὶ τὰς πλατωνικὰς ἰδέας ὡς ἀληθεῖς δεχομένοις καὶ ὡς αὐθυπόστατον τὴν ὕλην παρὰ τῶν ἰδίων μορφοῦσθαι λέγουσι καὶ προφανῶς διαβάλλουσι τὸ αὐτεξούσιον τοῦ δημιουργοῦ τοῦ ἀπὸ τοῦ μὴ ὄντος εἰς τὸ εἶναι παραγαγόντος τὰ πάντα καὶ ὡς ποιητοῦ πᾶσιν ἀρχὴν καὶ τέλος ἐπιτιθέντος ἐξουσιαστικῶς καὶ δεσποτικῶς, Ἀνάθεμα (γ΄).
Τοῖς λέγουσιν ὅτι ἐν τῇ τελευταίᾳ καὶ κοινῇ ἀναστάσει μεθ’ ἑτέρων σωμάτων οἱ ἄνθρωποι ἀναστήσονται καὶ κριθήσονται, καὶ οὐχὶ μεθ’ ὧν κατὰ τὸν παρόντα βίον ἐπολιτεύσαντο, ἅτε τούτων φθειρομένων καὶ ἀπολλυμένων, καὶ ληροῦσι κενὰ καὶ μάταια κατ᾿ αὐτοῦ τοῦ Χριστοῦ καὶ Θεοῦ ἡμῶν καὶ τῶν μαθητῶν αὐτοῦ, διδασκάλων δὲ ἡμετέρων, οὕτω διδαξάντων ὡς μεθ’ ὧν ἐπολιτεύσαντο ἄνθρωποι σωμάτων μετὰ τούτων καὶ κριθήσονται, ἔτι δὲ καὶ τοῦ μεγάλου ἀποστόλου Παύλου, καὶ διαρρήδην ἐν τῷ περὶ ἀναστάσεως λόγῳ πλατύτερον διὰ παραδειγμάτων τὴν ἀλήθειαν ἀναδιδάξαντος καὶ τοὺς ἑτέρως φρονοῦντας ὡς ἄφρονας ἀπελέγξαντος· τοῖς γοῦν τοῖς τοιούτοις ἀντινομοθετοῦσι δόγμασι καὶ διδάγμασιν, Ἀνάθεμα (α΄).
Τοῖς δεχομένοις καὶ παραδιδοῦσι τὰ μάταια καὶ ἑλληνικὰ ῥήματα· ὅτι τε προΰπαρξις ἐστ thriskeftika
(ἐκδ. Φῶς ΧΕΕΝ, Ἀθῆναι 2010, σσ. 173-178, 618-635)
Μετά τήν Ἀπόλυσιν τοῦ Ὄρθρου, καί πρό τῆς Λειτουργίας, λιτανεύομεν κοινῶς μετά τῶν ἁγίων τοῦ Σταυροῦ ξύλων, καί τῶν σεπτῶν Εἰκόνων, καί ἀπερχόμεθα ἐν τόπῳ ὡρισμένῳ, ὅπου δεῖ ἀναγινώσκειν τό Συνοδικόν. Πορευομένων δέ καί ἀναστρεφόντων ἡμῶν, ψάλλομεν τόν παρόντα Κανόνα, ποίημα τοῦ ἁγίου Πατρός ἡμῶν Θεοδώρου τοῦ Στουδίτου.
Ὠδη α΄. Ἦχος πλ. β΄.
Βοηθός καί σκεπαστής….
Χαριστήριον ὠδήν, τῷ εὐεργέτῃ Θεῷ τῶν ὅλων, ἄσωμεν πιστοί, ὅτι ἤγειρεν ἡμῖν, σωτήριον κέρας, βασιλείαν κραταιάν, Ὀρθοδοξίας πρόμαχον. (Δίς)
Ἐπεφάνη ἀληθῶς, ἡ θεία χάρις, τῇ Οἰκουμένῃ, δόξα καί τιμή, πεφανέρωται νῦν, σκιρτᾷ Ἐκκλησίᾳ, δεξαμένη τήν στολήν, τῆς ἑαυτῆς γυμνώσεως.
Τόν χιτῶνα τοῦ Χριστοῦ, διερρηγμένον ὑπό τοῦ πλάνου, καί φαρμακουργοῦ, Ἰωάννου τό πρίν, οἱ θεῖοι Πατέρες, ἐξυφάναντες σαφῶς, τῇ Ἐκκλησίᾳ ἔδωκαν.
Τοῦ Κυρίου τήν μορφην, ἀπολαβοῦσα ἡ Ἐκκλησία, χαίρει καί σκιρτᾷ, σύν τοῖς τέκνοις αὐτῆς, ὡς νίκης βραβεῖα, δεξαμένη παρ’ αὐτοῦ, Ὀρθοδοξίας σύμβολα.
Αἰσχυνθήτωσαν λοιπόν, καί ἐντραπήτωσαν μεμηνότες, Λῆζιξ ὁ δεινός, καί Ἀντώνιος, σύν τῷ Ἰωάννῃ, καί Θεόδωρος ἀμφοῖν, οἱ ἀρνηταί τῆς πίστεως.
Ἰαννῆς καί Ἰαμβρῆς, ἀνθεστηκότες τῷ νομοθέτῃ, πάλαι Μωϋσῆ, κατησχύνθησαν· νυνί δέ ὁ πλάνος, Ἰωάννης ἀληθῶς, σύν Ἀντωνίῳ δείκνυνται.
Σύ διέρρηξας Χριστέ, τήν ξυνωρίδα τῶν θεομάχων, καί τόν στολισμόν, ἀποδέδωκας νῦν, τῇ σῇ Ἐκκλησίᾳ, ὑπέρ ἧς ὡς ἀγαθός, τό Αἷμα σου ἐξέχεας.
Δόξα Σέ Τριάς θεολογῶ, καί προσκυνῶ σου τό θεῖον κράτος˙ ρῦσαι πειρασμῶν, ἐκ παντοίων με˙ εἰς σέ γάρ πιστεύω, τόν Πατέρα και Υἱόν, καί Πνεῦμα τό Πανάγιον.
Καί νῦν… Θεοτοκίον
Τήν βασίλειον στολήν, ἐκ σοῦ Παρθένε Θεός φορέσας, ὤφθη τοῖς βροτοῖς, ἀνθρωπόμορφος, διπλοῦς κατ’ οὐσίαν˙ οὗ τό εἶδος τῆς μορφῆς, ἐν προσκυνήσει ἔχομεν.
Ὠδη γ'. Στερέωσον Κύριε…
Εὐφραίνεσθε ἅπαντες, χοροί Πατέρων και Ἀποστόλων, καθορῶντες τήν προσκύνησιν, τῶν Εἰκόνων, ἥν περ ἐμφανῶς παρεδώκατε. (Δίς)
Τό κάλλος μου ἔλαβον, καί τήν στολήν μου ἐνεδυσάμην, ἐκβοάτω ἡ πανάμωμος, Ἐκκλησία, ἥν περ Ἰωάννης ἐξέδυσεν.
Αἰσχύνθητε ἄνομοι, ἐρεσχελοῦντες κατά Κυρίου˙ ἐσαρκώθη καί ἐφάνη γάρ, ἐν εἰκόνι˙ ἥν περ σχετικῶς ἀσπαζόμεθα.
Τά βέβηλα δόγματα, καί τάς ἀθέσμους διδασκαλίας, Ἰωάννου τοῦ παράφρονος, τίς ἐξείποι, τρόπους δελφικούς ἐκτιθέμενος;
Ἀνάθεμα Λήζικι, καί Ἰωάννῃ σύν Ἀντωνίῳ, Θεοδώρῳ τῷ ἀθέῳ τε, καί βλασφήμῳ, ἅμα Θεοδότῳ παράφρονι.
Τά αἵματα κράζουσι, τά ἐκχυθέντα ὑπερ τῆς θείας, σαρκοφόρου ὁμοιώσεως, τοῦ Δεσπότου, ἅπερ Ἰωάννης ἐξέχεεν.
Ἐδίωξε Κύριος, τήν ξυνωρίδα τῶν ἀλλοτρίων, καί ἀπέδωκε τά ἴδια, τοῖς ἰδίοις. Δόξα τῇ αὐτοῦ ἀγαθότητι.
Δόξα…
Τήν ἄναρχον θέλησιν, καί ἐξουσίαν καί βασιλείαν, τῆς Τριάδος προσκυνήσωμεν, ὀρθοδόξως, Ἄρειον ἀεί στηλιτεύοντες.
Καί νῦν... Θεοτοκίον
Κυρίως σε Δέσποιναν, ὁμολογοῦμεν Θεόν τεκοῦσα, μή προσέχοντες τοῖς ρήμασι, Νεστορίου, ἀλλά τῶν Πάτερων τοῖς δόγμασιν.
Ὠδή δ'. Ἀκηκοεν ὁ Προφήτης Ἀγάλλου ἡ Ἐκκλησία καί πᾶσα πόλις και χώρα ἐν εὐφροσύνῃ, ἀνοιγέσθω νῦν τά ἀσκητήρια, καί οί παρθενῶνες καλλωπίζεσθε˙ τά Λείψανα, καί Εἰκονίσματα τῶν Μαρτύρων, ἀξίως προσκυνείσθωσαν. (Δίς)
Χριστός ὑμᾶς προσκαλεῖται, συνέλθετε νῦν προθύμως, θείοι Πατέρες, καί τήν θέαν τῆς αὐτοῦ σαρκώσεως, Ἀποστολικῶς ἀνιστορήσατε, τά θαύματα καί τά παθήματα, καθώς γράφει, τό θεῖον Εὐαγγέλιον.
Ἀθροίσθητε γεγηθότες, τά πλήθη τῶν Μοναζόντων ἐν παρρησίᾳ˙ ἐάν γάρ κακῶς ἰσχύσωσι, πάλιν ἠττηθήσονται οί δείλαιοι˙ καί ἥν ἄν βουλήν βουλεύσωνται οἱ τοιοῦτοι, διασκεδάσει Κύριος.
Αἱ μάστιγες τῶν Πατέρων, τά αἵματα τῶν μωλώπων ἔλειψαν ὄντως˙ ἐξορίαι συνεχεῖς ἐπαύσαντο, καί εἰρήνη πᾶσι πολιτεύεται˙ οὐκέτι ἰσχύσει τό δρᾶμα τῆς γοητείας˙ Θεός γάρ μεθ’ ἡμῶν ἐστιν.
Ἡ ἄμπελος τῆς κακίας, ἐξέτεινε τά κλήματα τῆς ἀσεβείας, καί τόν βότρυν τόν πικρόν, ἐξήνθησε, καί θυμός δρακόντιος ὁ οἶνος αὐτῶν˙ ἐξ οὗ τόν λαόν τοῦ Κυρίου ἐπότισαν ὄντως, τήν θολεράν κακόνοιαν.
Ἐμίαναν τόν Ναόν σου, ἀθέσμοις χειροτονίαις διά χρημάτων, καί κανονικῶς οὗτοι ἐκβέβληνται, καί τῆς θείας δόξης ἐκπεπτώκασιν, ὁ Σίμων ὁ μάγος, σύν τούτῳ καί Ἰωάννης, καί ὁ δεινός Ἀντώνιος.
Τούς θῆρας καί θεομάχους, Ἀντώνιον τόν βέβηλον, καί παραβάτην, Ἰωάννην τόν σατανογνώμονα, καί τῆς Ἐκκλησίας πολεμήτορα, ὡς λύκους βαρεῖς συνελθόντες, Ἀνάθεμα τρίς, πιστοί ἀναβοήσωμεν.
Δόξα…
Ἡ ἄκτιστος Μοναρχία, Πάτερ Υἱέ καί Πνεῦμα σέ προσκυνοῦμεν˙ ἥν τά Χερουβίμ τά πολυόμματα, καί τά Σεραφίμ τά ἐξαπτέρυγα, ὑμνοῦσι κραυγάζοντα˙ Ἅγιος, Ἅγιος, Ἅγιος εἶ ὦ Παντοκράτορ Ὕψιστε.
Καί νῦν... Θεοτοκίον
Ἁγίων ἁγιωτέρα, καί πάντων ὑψηλοτέρα τῶν ποιημάτων, μόνη ἀνεδείχθης Μητροπάρθενε, ὡς αὐτόν κυήσασα τόν Πλάστην σου˙ διό τήν ἁγίαν μορφήν σου Θεογεννῆτορ, ἐν προσκυνήσει ἔχομεν.
Ὠδή ε'. Ἐκ νυκτός ὀρθρίζοντα...
Ὁ Χριστός νενίκηκε, σκιρτάτω ἡ γῆ˙ πέπαυται θόρυβος, πέπαυται καί ὁ κλαυθμός, τῶν τοῦ Κυρίου δούλων˙ ἡ πίστις δε πανταχοῦ, τῷ Κόσμῳ ἐφηπλώθη. (Δίς)
Ἐν εἰκόνι βλέποντες τήν Σταύρωσιν, σέβοντες στέργομεν, ἀσπαζόμενοι Χριστόν, καί τά αὐτοῦ σημεῖα, καί προσκυνοῦμεν αὐτά, οὐχ ὡς θεούς τιμῶντες.
Πνεῦμα τό πολύρρημον καί βλάσφημον, Λήζικος πέπαυται, τό λαλοῦν διαπαντός, ἡμέραν καθ' ἡμέραν, κατά τῆς θείας μορφῆς, Χριστοῦ καί τῶν Ἁγίων.
Ἵνα τί τρισάθλιε μεμίσηκας, μόρφωσιν ἄχραντον, τῆς σαρκώσεως Χριστοῦ, καί τῶν Ἁγίων πάντων; μή γάρ εἰδώλοις κωφοῖς, οἱ πιστοί προσκυνοῦμεν;
Ἀσεβείας ὄργανα τυγχάνοντες, ἤθροισαν σύνοδον, ἱερέων ἀσεβῶν, κατά Θεοῦ ὑψίστου, ὡς Ἰουδαῖοι τό πρίν, Ἄννας καί Καϊάφας.
Ἐν ἡμέρᾳ Κρίσεως πανάθλιε, στήσονται ἔλεγχοι, τῆς ἀθεου σου ψυχῆς, ὁ δῆμος τῶν Πατέρων˙ ὧν περ ἀμέτροις πληγαῖς, ἐγύμνωσας τάς σάρκας.
Ἐκκλησίαι ἅπασαι βοήσουσι , κράζουσαι ἅπασαι στερηθεῖσαι ὑπό σοῦ, τῆς μορφῆς τοῦ Κυρίου, καί τῶν Ἁγίων αὐτοῦ, τῶν ἱερῶν Εἰκόνων.
Δόξα…
Ἡ τό πᾶν συνέχουσα τῷ κράτει σου, δόξα σοι, δόξα σοι, τρισυπόστατε Μονάς, Πάτερ Υἱέ καί Πνεῦμα, τούς πεποθότας εἰς σέ, ρῦσαι παντοίας βλάβης.
Καί νῦν… Θεοτοκίον
Ὡς χρυσοκαλλώπιστον λυχνίαν σε, Δέσποινα σέβομεν, τήν τό φῶς τό νοητόν, γεννήσασαν τῷ κόσμῳ, καί τήν ζοφώδη ἀχλύν, μειώσασαν Παρθένε.
Ὠδή στ΄. Ἐβόησα ἐν ὅλῃ καρδίᾳ μου...
Ἐβόησαν οἱ ἄγρυπνοι φύλακες, τῆς Ἐκκλησίας τοῦ Χριστοῦ, πρός αὐτόν αἰτοῦντες, δοθῆναι τήν εἰρήνην˙ καί εἰσήκουσε, καί προσέσχε τῇ δεήσει. (Δίς)
Διήλεγκται τοῦ πλάνου τά θήρατρα, ταῖς τῶν Πατέρων διδαχαῖς, καί Θεός ὑμνεῖται, σαρκί μεμορφωμένος, ὁ ἀπερίγραπτος, τῇ Θεότητι ὑπάρχων.
Οἱ συνεργοί τῆς πλάνης αἰσχύνεσθε, καί ἀπολέσθωσαν ὁμοῦ, σύν τῷ Ἀντωνίῳ, Θεόδοτος καί Λῆζιξ, καί Θεόδωρος, ὁ βυθός τῆς ἀπωλείας.
Τό στόμα σου διήνοιξας ἄθλιε, οὐκ ἐν ὠδαῖς πνευματικαΐς, ἀλλ' ἐν βλασφημίαις, κατά τοῦ σοῦ Δεσπότου, ἀπωθούμενος, τήν σεπτήν Εἰκονουργίαν.
Διέστρεψας Πάτερων τά δόγματα, καί Ἀποστόλων διδαχάς, ἀλληνάλλως γράφων, κατά τήν σήν θρησκείαν, τήν παράνομον, Ἰωάννη χριστομάχε.
Σοῦ ὁ καπνός δακρύων ἐνεπλησε, τῶν εὐσεβούντων ὀφθαλμούς˙ ἀλλά τῷ ἀνέμῳ, τῶν θείων Διδασκάλων, διεσκέδασται, ματαιόφρων Ἰωάννη.
Σύ τήν στολήν τήν θείαν διέρρηξας, ὥσπερ ὁ Ἄρειος τό πρίν, τόν Χριστοῦ Χιτῶνα˙ διό τῆς Ἐκκλησίας, πόρρω βεβλησαι, ἐκβληθείς καθάπερ κύων.
Δόξα…
Μίαν ἀρχήν δοξάζω Θεότητος, ἐν ὑποστάσεσι τρισίν˙ εἷς Θεός γάρ ἐστι, Πατήρ, Υἱός καί Πνεῦμα, κἄν διήρηται, χαρακτῆρσι καί προσώποις.
Καί νῦν... Θεοτοκίον
Προφητικῶς Ἁγνή θεοδοξαστε, πόλις ἐδείχθης τοῦ Θεοῦ, ἐξ ἧς ἐγενννήθη, αὐτός ὁ Ποιητής σου, μετά τόκον σε, ὡς τό πρίν διαφυλάξας.
Ὠδή ζ΄. Ἡμάρτομεν, ἠνομήσαμεν...
Τήν κάμινον τῆς αἱρέσεως νῦν κατέσβεσεν ἡ θεία χάρις, φλέγουσα νοουμένους Χαλδαίους, καί δροσίζουσα, Τριάδος θεράποντας, τετραπλαῖς ἑβδομάδεσιν ἐτῶν, αὐτήν διακρατήσασαν. (Δίς)
Πεποίκιλται, περιβέβληται, κεκαλλώπισται ἡ Ἐκκλησία, μόρφωσιν τοῦ Δεσπότου τῶν ὅλων, τῆς σαρκώσεως, καί τῶν παθημάτων αὐτοῦ, καί τά σύμβολα φέρουσα εἰς τέλος, κατά τούς θείους θεσμούς.
Ἑόρταζε, πανηγύριζε, ὁ χριστώνυμος λαός Κυρίου, βλέπων τήν Ἐκκλησίαν καί πάλιν, διαλάμπουσαν τό κάλλος τῆς θείας μορφῆς˙ ἥν Θεός ὤν ἐφόρεσεν, ὡς ἄνθρωπος, διά τό σῶσαι ἡμᾶς.
Ἐπτώχευσε, καί ἐπείνασε, καί ἐδίψησε σαρκί ὁ Λόγος, ταῦτα τῆς ἀνθρωπίνης οὐσίας, ἰδιώματα, δι’ ὧν περιγράφεται˙ οὗτος δέ τῇ Θεότητι, ἁπλοῦς ἐστι, καί ἀπερίγραπτος.
Κατήργηται, τά τεράστια, καί μαντεύματα τοῦ χριστομάχου˙ ἴσος γάρ τῶν Ἑλλήνων ἐδείχθη, ὑψαυχούμενος, τοῖς τούτων συγγράμμασιν, ἅ δικαίως ἐλίκμησαν καθάπαν, αἱ τῶν δικαίων φωναί.
Τά κρύφια, καί παμβέβηλα, καί ψυχώλεθρα διδάγματά σου, ποία ἐκδιηγήσεται γλῶσσα; ἤ τήν πρόρρησιν, τῆς ἐγγαστριμύθου σου, Ἰωάννη ψευδώνυμε, καί πρόδρομε τοῦ ἀντιχρίστου Σατάν;
Οὐκ ἔδει σε, ὦ παράνομε, ὀνομάζεσθαι τοιαύτην κλῆσιν, μᾶλλον δέ Πυθαγόραν καί Κρόνον, καί Ἀπόλλωνα, ἤ τινά τῶν ἄλλων Θεῶν˙ ὧν τόν βίον ἐζήλωσας, τερπόμενος, ταῖς ἀσελγείαις αὐτῶν.
Δόξα...
Αΐδιον, παντοδύναμον, ἀκατάληπτον πιστοί Τριάδα, πάντες Πατέρα Υἱόν, καί Πνεῦμα προσκυνήσωμεν, καί θεολογήσωμεν, ἀσυγχύτως κραυγάζοντες˙ Ἅγιος, Ἅγιος, Ἅγιος, εἶ ὁ Θεός.
Καί νῦν... Θεοτοκίον
Πανύμνητε, πολυδόξαστε, Μητροπάρθενε Θεοκυῆτορ, λύτρωσαι χαλεπῶν ἐγκλημάτων, τούς τιμῶντάς σου, τήν ἄχραντον κύησιν˙ οὐ γάρ ἄλλην βοήθειαν κεκτήμεθα, πλήν σου Θεόνυμφε.
Ὠδή η΄. Ὅν Στρατιαί Οὐρανῶν...
Προφητικῶς, ἀγαλλιασώμεθα, καί εὐφρανθῶμεν πιστοί, πάντες μυστικῶς˙ αὕτη γάρ ἡ ἡμερα, ἐν ᾗ Χριστός ὁ Λόγος, τήν ἰδίαν στολήν, ἀπεδωκε τῇ Ἐκκλησίᾳ. (Δίς)
Πολεμικῶς, ὥσπερ παρετάξαντο, κατά Χριστοῦ τῆς μορφῆς, ὁμοθυμαδόν, Λῆζιξ καί Ἰωάννης, τό ζεῦγος τοῦ Βελίαρ, πελέκει τῆς κακίας, ἐγκόψαντες τήν Ἐκκλησίαν.
Τίς μή θρηνήσῃ, τό μέγα τόλμημα, τήν θείαν βλέπων Μορφήν, τήν ἐν τῇ Χαλκῇ, πύλῃ τοῦ παλατίου, ὑπό ἀνδρῶν ἀνόμων, λίθοις βαλλομένην, τῇ διδαχῇ τοῦ Ἰωάννου;
Πῶς οὐ συνῆκας, τυφλέ πανάθλιε, ἐσκοτισμένε τόν νοῦν, τήν ὑπ’οὐρανόν, βλέπων κεκοσμημένην, Χριστοῦ τῷ χαρακτῆρι, ἀλλά μόνος ἔσχες, τό φρόνημα τῶν Ἰουδαίων;
Σύ παντελῶς, καθελεῖν ἐνόμισας, τῶν θείων Ἐκκλησιῶν, τήν σαρκολαμπῆ, Μόρφωσιν τοῦ Κυρίου, καί τῶν Ἁγίων πάντων˙ ἀλλ’ ἡ θεία χάρις, κάθεῖλε σου τήν τυραννίδα.
Τά ἱερά, τῶν Ἁγίων Λείψανα, καί τάς Εἰκόνας αὐτῶν, Λῆζιξ ὁ δεινός, ἅμα τῷ Ἰωάννῃ, οὐδόλως προσκυνεῖσθαι, ἔφασκον ἀνόμως, οἱ ἀρνηταί τῆς εὐσέβειας.
Δόξα...
Παντουργικήν, Θεαρχίαν σέβοντες, ἐν χαρακτῆρσι τρισί, πάντες εὐσεβῶς, ἄναρχον τόν Πατέρα, συνάναρχον τόν Λόγον, Πνεῦμα συνεκλάμπον, δοξάσωμεν εἰς τούς αἰῶνας.
Καί νῦν… Θεοτοκίον
Χριστιανῶν, ἡ βεβαία γέφυρα, τό καύχημα τῶν πιστῶν, καί καταφυγή, Δέσποινα Θεοτόκε, αὐτή ὑπάρχεις μόνη, πάντας βοηθοῦσα, καί σώζουσα ἐκ τῶν κινδύνων.
Ὠδή θ΄. Ἀσπόρου συλλήψεως…
Τά ἔθνη κροτήσατε, χοροί Πατέρων σπεύσατε, οἰ Ἀσκηταί δέ, καί οἱ ἐν τοῖς ὄρεσι, συνέλθετε ἥκετε, οἱ διωχθέντες πάλαι, ἀπό τοῦ πλάνου καί δυσσεβοῦς, Ἰωάννου στηλιτεῦσαι, τάς μαγείας καί μαντεύματα. (Δίς)
Εὐφραίνου ἡ ἔρημος, καί Οἰκουμένη ἅπασα, τά ὄρη πάντα, γλυκασμόν σταλάξατε, βουνοί ἀγαλλιᾶσθε, ὅτι Χριστός ὁ Λόγος, εἰρήνην ἔδωκε τοῖς ἐν γῇ, καί ταῖς θείαις Ἐκκλησίαις, τήν ἑνότητα τῆς Πίστεως.
Θεός ἐκδικήσεων, νῦν ἐπαρρησιάσατο, Χριστός ἐπέστη, ἐνισχύων σήμερον, τούς θείους Διδασκάλους, ἐν παρρησίᾳ λέγειν, τήν συγκατάβασιν αὐτοῦ, καί τήν σάρκωσιν βεβαίως, ἐν εἰκόνι περιγράφεσθαι.
Μακρόθυμε Κύριε, ὡς θαυμαστά τά ἔργα σου! τίς ἀριθμήσει, τήν φιλανθρωπίαν σου; πῶς βλέπων κτεινομένους, διά τήν σήν Εἰκόνα, τούς Ἱερεῖς σου, καί Ἀσκητάς, οὐ κατέφλεξας τούς πλάνους, ἀλλ’ ἠνέσχου ὑβριζόμενος;
Ὁ πήξας ἀσάλευτον, τήν Ἐκκλησίαν Κύριε, καί πύλαι Ἅδου, ταύτης οὐ κατίσχυσαν˙ αὐτός τήν εἰρήνην σου, παράσχου τῷ λαῷ σου˙ ἵνα σέ πάντες εἰλικρινῶς, ἐν μιᾷ δοξολογίᾳ, προσκυνῶμεν, καί δοξάζωμεν.
Ἀνάθεμα ἔστωσαν, οἱ μή τιμῶντες Δέσποτα, τόν χαρακτῆρα, τῆς σῆς σωματώσεως, πρό πάντων Ἰωάννης, ἅμα σύν Ἀντωνίῳ, καί Θεοδώρῳ τῷ δυσσεβεῖ, Θεοδότῳ καί τοῖς ἄλλοις, τοῖς ἀλάστορσι τῆς Πίστεως.
Ὁ δοῦς τήν εἰρήνην σου, τοῖς Ἀποστόλοις Δέσποτα, καί νῦν παράσχου, σήν γαλήνην ἅπασι, συνάγων τῇ χειρί σου, τούς διεσκορπισμένους, καί ὥσπερ πρόβατα λογικά, συναρίθμησον τῇ μάνδρᾳ, τῆς ἁγίας Ἐκκλησίας σου.
Δόξα...
Δοξάζω Θεότητα, Πατρός Υἱοῦ καί Πνεύματος, τήν μίαν φυσιν, τρισίν ὑποστάσεσιν, οὐσίαν ἀμέριστον, διαιρετήν προσώποις, ὁμοβασίλειον παντουργόν, πανσθενῆ τελεταρχίαν, τήν συνέχουσαν τά σύμπαντα.
Καί νῦν... Θεοτοκίον
Ἡ πάντων βοήθεια, καί σκέπη καί ἀντίληψις, Θεοκυήτορ, δεῖξον ὅτι δύνασαι, πρεσβεύειν ὑπέρ πάντων, εἰς σέ καταφευγόντων, καί ἀπελαύνεις τούς δυσσεβεῖς, τῇ δυνάμει τοῦ Υἱοῦ σου˙ ὡς γάρ Μήτηρ πάντα δύνασαι.
Καί ὅτε φθάσωμεν εἰς τόν ὡρισμένον τόπον, λέγομεν τό Τροπάριον.
Τὴν ἄχραντον Εἰκόνα σου προσκυνοῦμεν Ἀγαθέ, αἰτούμενοι συγχώρησιν τῶν πταισμάτων ἡμῶν, Χριστὲ ὁ Θεός, βουλήσει γὰρ ηὐδόκησας σαρκὶ ἀνελθεῖν ἐν τῷ Σταυρῷ, ἵνα ῥύσῃ οὓς ἔπλασας ἐκ τῆς δουλείας τοῦ ἐχθροῦ, ὅθεν εὐχαρίστως βοῶμέν σοι, Χαρᾶς ἐπλήρωσας τὰ πάντα, ὁ Σωτὴρ ἡμῶν, παραγενόμενος εἰς τὸ σῶσαι τὸν Κόσμον.
Δόξα… Καί νῦν… Ἕτερον. Ἦχος β’.
Καί ό χορός τῶν Προφητῶν, μετά Μωσῆ, καί Ἀαρών, εὐφροσύνῃ εὐφραίνεται σήμερον˙ ὅτι πέρας τῆς προφητείας προαγαγών, λάμπει ὁ Σταυρός, ἐν ᾧ ἡμᾶς ἔσωσας. Αὐτῶν ταῖς ἱκεσίαις Χριστέ ὁ Θεός, σῶσον τάς ψυχάς ἡμῶν.
ΣΥΝΟΔΙΚΟΝ ΤΗΣ ΑΓΙΑΣ ΚΑΙ ΟΙΚΟΥΜΕΝΙΚΗΣ Ζ΄ ΣΥΝΟΔΟΥ ΥΠΕΡ ΤΗΣ ΟΡΘΟΔΟΞΙΑΣ
ΠΡΟΟΙΜΙΟΝ
Εὐλόγησον Πάτερ.
Ἐποφειλομένη πρὸς Θεὸν ἐτήσιος εὐχαριστία καθ’ ἣν ἡμέραν ἀπελάβομεν τὴν τοῦ Θεοῦ Ἐκκλησίαν σὺν ἀποδείξει τῶν τῆς εὐσεβείας δογμάτων καὶ καταστροφῇ τῶν τῆς κακίας δυσσεβημάτων.
Προφητικαῖς ἑπόμενοι ῥήσεσιν ἀποστολικαῖς τε παραινέσεσιν εἴκοντες καὶ εὐαγγελικαῖς ἱστορίαις στοιχούμενοι, τῶν ἐγκαινίων τὴν ἡμέραν ἑορτάζομεν. ᾿Ησαΐας μὲν γάρ φησιν ἐγκαινίζεσθαι νήσους πρὸς τὸν Θεόν, τὰς ἐξ ἐθνῶν ὑπαινιττόμενος ἐκκλησίας· εἶεν δ’ ἂν ἐκκλησίαι, οὐχ αἱ τῶν ναῶν ἁπλῶς οἰκοδομαὶ καὶ φαιδρότητες, ἀλλὰ τῶν ἐν αὐταῖς εὐσεβούντων τὸ πλήρωμα, καὶ οἷς ἐκεῖνοι τὸ θεῖον ὕμνοις καὶ δοξολογίαις θεραπεύουσιν. Ὁ δὲ ἀπόστολος, αὐτὸ τοῦτο παραινῶν, «ἐν καινότητι ζωῆς περιπατῆσαι» διακελεύεται καὶ «εἴ τις ἐν Χριστῷ καινὴ κτίσις» ἀνακαινίζεσθαι. τὰ δέ γε κυριακὰ λόγια τὴν προφητικὴν δεικνύντα κατάστασιν, «ἐγένετο, φησίν, τὰ ἐγκαίνια ἐν ᾿Ιεροσολύμοις καὶ χειμὼν ἦν», εἴτε νοητὸς καθ’ ὃν τὸ τῶν Ἰουδαίων ἔθνος κατὰ τοῦ κοινοῦ σωτῆρος τὰς τῆς μιαιφονίας ἐκίνει καταιγίδας καὶ τὸν τάραχον, εἴτε καὶ ὁ τὰς σωματικὰς αἰσθήσεις τῇ τοῦ ἀέρος ἐπὶ τὸ κρυμῶδες παραλυπῶν μεταβολῇ. Γέγονε γὰρ δή, γέγονε καὶ καθ’ ἡμᾶς χειμὼν οὐχ ὁ τυχών, ἀλλ’ ὁ τῷ ὄντι τῆς μεγάλης κακίας ἐκχέων τὴν ὠμότητα, ἀλλ’ ἤνθησεν ἡμῖν τῶν χαρίτων τοῦ Θεοῦ τὸ πρωτοκαίριον ἔαρ, ἐν ᾧ καὶ τὴν εὐχαριστήριον τῶν ἐπ’ ἀγαθοῖς θερισμόν τῷ Θεῷ συνεληλύθαμεν ποιήσασθαι, ὡς ἂν φαίημεν ψαλμικώτερον· «θέρος καὶ ἔαρ σὺ ἔπλασας αὐτά, μνήσθητι ταύτης». καὶ γὰρ τοὺς ὀνειδίσαντας Κύριον ἐχθροὺς καὶ τὴν τούτου ἁγίαν προσκύνησιν ἐν ἁγίαις εἰκόσιν ἐξατιμώσαντας ἐπαρθέντας τε καὶ ὑψωθέντας τοῖς δυσσεβήμασι, κατέρραξεν αὐτοὺς ὁ τῶν θαυμασίων Θεὸς καὶ τὸ τῆς ἀποστασίας φρύαγμα κατηδάφισεν, οὐδὲ παρεῖδε τὴν φωνὴν τῶν βοώντων πρὸς αὐτόν· «μνήσθητι, Κύριε, τοῦ ὀνειδισμοῦ τῶν δούλων σου, οὗ ὑπέσχον ἐν τῷ κόλπῳ μου πολλῶν ἐθνῶν· οὗ ὠνείδισαν οἱ ἐχθροί σου, Κύριε, οὗ ὠνείδισαν τὸ ἀντάλλαγμα τοῦ Χριστοῦ σου». Ἀντάλλαγμα δ’ ἂν εἶεν τοῦ Χριστοῦ οἱ τῷ θανάτῳ αὐτοῦ ἐξαγορασθέντες καὶ πεπιστευκότες αὐτῷ διά τε λόγων ἀνακηρύξεως καὶ εἰκονικῆς ἀνατυπώσεως, δι’ ὧν τὸ μέγα τῆς οἰκονομίας ἔργον τοῖς λελυτρωμένοις ἐπιγινώσκεται, διὰ σταυροῦ τε καὶ τῶν πρὸ τοῦ σταυροῦ καὶ μετὰ τὸν σταυρὸν παθῶν τε καὶ θαυμάτων αὐτοῦ· ἐξ ὧν καὶ ἡ τῶν αὐτοῦ παθημάτων μίμησις εἰς ἀποστόλους, ἐκεῖθέν τε εἰς μάρτυρας διαβαίνει, καὶ δι’ αὐτῶν μέχρις ὁμολογητῶν καὶ ἀσκητῶν κάτεισι.
Τούτου τοίνυν τοῦ ὀνειδισμοῦ, «οὗ ὠνείδισαν οἱ ἐχθροὶ Κυρίου, οὗ ὠνείδισαν τὸ ἀντάλλαγμα τοῦ χριστοῦ αὐτοῦ», ἐπιμνησθεὶς ὁ Θεὸς ἡμῶν ὁ τοῖς ἰδίοις σπλάγχνοις παρακαλούμενος καὶ ταῖς μητρικαῖς αὐτοῦ δεήσεσιν ἐπικαμπτόμενος, ἔτι δὲ καὶ ἀποστολικαῖς καὶ πάντων τῶν ἁγίων, οἳ συνεξυβρίσθησαν αὐτῷ καὶ συνεξουθενώθησαν ἐν ταῖς εἰκόσιν, ἵνα, ὥς περ συνέπαθον σαρκί, οὕτως ἄρα, ὡς ἔοικε, καὶ ταῖς κατὰ τῶν σεπτῶν εἰκόνων αὐτῷ συγκοινωνήσωσιν ὕβρεσιν, ἐνήργησεν ὕστερον ὅ τι βεβούληται σήμερον, καὶ πέπραχε δεύτερον ὅ περ ἐτέλεσε πρότερον. πρότερον μὲν γάρ, μετὰ πολυετῆ τινα χρόνον τῆς τῶν ἁγίων εἰκόνων ἐκφαυλίσεως καὶ ἀτιμίας, ἐπανέστρεψε τὴν εὐσέβειαν εἰς ἑαυτήν· νυνὶ δέ, ὅ περ ἐστὶ δεύτερον, μικροῦ μετὰ τριάκοντα ἔτη κακώσεως, κατηρτίσατο τοῖς ἀναξίοις ἡμῖν τὴν τῶν δυσχερῶν ἀπαλλαγὴν καὶ τῶν λυπούντων τὴν ἀπολύτρωσιν καὶ τῆς εὐσεβείας τὴν ἀνακήρυξιν καὶ τῆς εἰκονικῆς προσκυνήσεως τὴν ἀσφάλειαν καὶ τὴν πάντα φέρουσαν ἡμῖν τὰ σωτήρια ἑορτήν. ἐν γὰρ ταῖς εἰκόσιν ὁρῶμεν τὰ ὑπὲρ ἡμῶν τοῦ δεσπότου πάθη, τὸν σταυρόν, τὸν τάφον, τὸν ᾅδην νεκρούμενον καὶ σκυλευόμενον, τῶν μαρτύρων τοὺς ἄθλους, τοὺς στεφάνους, αὐτὴν τὴν σωτηρίαν, ἣν ὁ πρῶτος ἡμῶν ἀθλοθέτης καὶ ἀθλοδότης καὶ στεφανίτης «ἐν μέσῳ τῆς γῆς κατειργάσατο». ταύτην σήμερον τὴν πανήγυριν ἑορτάζομεν, ἐν ταύτῃ εὐχαῖς καὶ λιτανείαις συνευφραινόμενοί τε καὶ συναγαλλόμενοι, ψαλμοῖς ἐκβοῶμεν καὶ ᾄσμασιν.
Ἔξω
Τίς θεὸς μέγας ὡς ὁ Θεὸς ἡμῶν; σὺ εἶ ὁ Θεὸς ἡμῶν ὁ ποιῶν θαυμάσια μόνος. (Τρίς)
Τοὺς φαυλιστὰς γὰρ τῆς σῆς δόξης ἐξεμυκτήρισας, τοὺς τολμητὰς κατὰ τῆς εἰκόνος καὶ θρασεῖς, δειλοὺς καὶ πεφευγότας ἀπέδειξας.
Ἀλλ’ ἡ μὲν εἰς Θεὸν εὐχαριστία καὶ τὸ δεσποτικὸν κατὰ τῶν ἀντιπάλων τρόπαιον ἐν τούτοις· τὰ δέ γε κατὰ τῶν εἰκονομαχούντων ἆθλά τε καὶ παλαίσματα ἕτερος λόγος καὶ λογογραφία διεξοδικωτέρα δηλώσει. ὡς ἐν καταπαύσει δέ τινι τῇ μετὰ τὴν ἐρημικὴν πάροδον, εἰς κατάσχεσιν τῆς νοητῆς ᾿Ιερουσαλὴμ καθεστῶτες, μωσαϊκῇ τινι μιμήσει, μᾶλλον δὲ θεϊκῇ διακελεύσει, οἷα στήλῃ τινὶ ἐκ μεγίστων λίθων συνηρμοσμένῃ καὶ πρὸς ἀποδοχὴν γραφῆς διατιθεμένῃ, ταῖς τῶν ἀδελφῶν καρδίαις τάς τε εὐλογίας αἳ ὀφείλονται τοῖς νομοφυλακτοῦσι καὶ τὰς ἀρὰς δὲ αἷς ἑαυτοὺς ὑποβάλλουσιν οἱ παρανομοῦντες, δίκαιόν τε καὶ ὀφειλόμενον δεῖν ᾠήθημεν ἀναγράψαι. Δι᾿ ὃ φαμὲν τάδε.
Τῶν τὴν ἔνσαρκον τοῦ Θεοῦ Λόγου παρουσίαν λόγῳ, στόματι, καρδίᾳ καὶ νοΐ, γραφῇ τε καὶ εἰκόσιν ὁμολογούντων, Αἰωνία ἡ μνήμη (γ΄).
Τῶν εἰδότων τῆς τοῦ Χριστοῦ μιᾶς καὶ τῆς αὐτῆς ὑποστάσεως τὸ ἐν οὐσίαις διάφορον καὶ ταύτης τὸ κτιστόν τε καὶ ἄκτιστον, τὸ ὁρατὸν καὶ ἀόρατον, τὸ παθητὸν καὶ ἀπαθές, τὸ περιγραπτὸν καὶ ἀπερίγραπτον, καὶ τῇ μὲν θεϊκῇ οὐσίᾳ τὸ ἄκτιστον καὶ τὰ ὅμοια προσαρμοζόντων, τῇ δὲ ἀνθρωπίνῃ φύσει τά τε ἄλλα καὶ τὸ περιγραπτὸν ἀνομολογούντων καὶ λόγῳ καὶ εἰκονίσμασιν, Αἰωνία ἡ μνήμη (γ΄).
Τῶν πιστευόντων καὶ διακηρυκευομένων ἤτοι εὐαγγελιζομένων τοὺς λόγους ἐπὶ γραμμάτων, τὰ πράγματα ἐπὶ σχημάτων, καὶ εἰς μίαν ἑκάτερον συντελεῖν ὠφέλειαν, τήν τε διὰ λόγων ἀνακήρυξιν καὶ τὴν δι’ εἰκόνων τῆς ἀληθείας βεβαίωσιν, Αἰωνία ἡ μνήμη (γ΄).
Τῶν τῷ λόγῳ ἁγιαζόντων τὰ χείλη, εἶτα τοὺς ἀκροατὰς διὰ τοῦ λόγου, εἰδότων τε καὶ κηρυσσόντων ὡς ἁγιάζεται μὲν ὁμοίως διὰ τῶν σεπτῶν εἰκόνων τὰ ὄμματα τῶν ὁρώντων, ἀνάγεται δὲ δι’ αὐτῶν ὁ νοῦς πρὸς θεογνωσίαν, ὥς περ καὶ διὰ τῶν θείων ναῶν καὶ τῶν ἱερῶν σκευῶν καὶ τῶν ἄλλων κειμηλίων, Αἰωνία ἡ μνήμη (γ΄).
Τῶν ἐπισταμένων ὡς ἡ ῥάβδος καὶ αἱ πλάκες, ἡ κιβωτὸς καὶ ἡ λυχνία καὶ ἡ τράπεζα καὶ τὸ θυμιατήριον τὴν παναγίαν προέγραφέ τε καὶ προδιετύπου παρθένον τὴν θεοτόκον Μαρίαν, καὶ ὡς ταῦτα μὲν προετύπου ταύτην, οὐ γέγονε δὲ ἐκείνη ταῦτα, γέγονε δὲ κόρη καὶ διαμένει μετὰ τὴν θεογεννησίαν παρθένος, καὶ διὰ τοῦτο μᾶλλον κόρην αὐτὴν τοῖς εἰκονίσμασι γραφόντων ἢ τοῖς τύποις σκιαγραφούντων, Αἰωνία ἡ μνήμη (γ΄).
Τῶν τὰς προφητικὰς ὁράσεις, ὡς αὐτὸ τὸ θεῖον αὐτὰς ἐσχημάτιζε καὶ διετύπου, εἰδότων καὶ ἀποδεχομένων καὶ πιστευόντων ἅ περ ὁ τῶν προφητῶν χορὸς ἑωρακότες διηγήσαντο, καὶ τὴν διά τῶν ἀποστόλων καὶ εἰς Πατέρας διήκουσαν ἔγγραφόν τε καὶ ἄγραφον παράδοσιν κρατυνόντων, καὶ διὰ τοῦτο εἰκονιζόντων τὰ ἅγια καὶ τιμώντων, Αἰωνία ἡ μνήμη (γ΄).
Τῶν συνιέντων Μωσέως λαλοῦντος· «προσέχετε ἑαυτοῖς ὅτι τῇ ἡμέρᾳ ᾗ ἐλάλησε Κύριος ὁ Θεὸς ἐν Χωρὴβ ἐπὶ τοῦ ὄρους, φωνὴν ῥημάτων ὑμεῖς ἠκούσατε, ὁμοίωμα δὲ οὐκ εἴδετε», καὶ εἰδότων ἀποκριθῆναι ὀρθῶς· εἰ δὲ εἴδομέν τι, ἀληθῶς δὲ εἴδομεν, ὡς ὁ τῆς βροντῆς υἱὸς ἡμᾶς ἐδίδαξεν· «ὃ ἦν ἀπ’ ἀρχῆς, ὃ ἀκηκόαμεν, ὃ ἑωράκαμεν, ὃ ἐθεασάμεθα τοῖς ὀφθαλμοῖς ἡμῶν καὶ αἱ χεῖρες ἡμῶν ἐψηλάφησαν, περὶ τοῦ Λόγου τῆς ζωῆς, καὶ ταῦτα μαρτυροῦμεν», καὶ πάλιν ὡς οἱ ἄλλοι τοῦ Λόγου μαθηταί· «καὶ συνεφάγομεν αὐτῷ καὶ συνεπίομεν», οὐ πρὸ τοῦ πάθους μόνον, ἀλλὰ καὶ μετὰ τὸ πάθος καὶ τὴν ἀνάστασιν· τῶν γοῦν διαστέλλειν θεόθεν δυναμωθέντων τὴν ἐν τῷ νόμῳ παραγγελίαν καὶ τὴν ἐν χάριτι διδασκαλίαν, καὶ τὸ ἐν ἐκείνῳ μὲν ἀόρατον, ἐν ταύτῃ δὲ καὶ ὁρατὸν καὶ ψηλαφητόν, καὶ διὰ τοῦτο τὰ ὁραθέντα τε καὶ ψηλαφηθέντα εἰκονογραφούντων καὶ προσκυνούντων, Αἰωνία ἡ μνήμη (γ΄).
Οἱ προφῆται ὡς εἶδον, οἱ ἀπόστολοι ὡς ἐδίδαξαν, ἡ ἐκκλησία ὡς παρέλαβεν, οἱ διδάσκαλοι ὡς ἐδογμάτισαν, ἡ οἰκουμένη ὡς συμπεφρόνηκεν, ἡ χάρις ὡς ἔλαμψεν, ἡ ἀλήθεια ὡς ἀποδέδεικται, τὸ ψεῦδος ὡς ἀπελήλαται, ἡ σοφία ὡς ἐπαρρησιάσατο, ὁ Χριστὸς ὡς ἐβράβευσεν· οὕτω φρονοῦμεν, οὕτω λαλοῦμεν, οὕτω κηρύσσομεν, Χριστὸν τὸν ἀληθινὸν Θεὸν ἡμῶν καὶ τοὺς αὐτοῦ ἁγίους ἐν λόγοις τιμῶντες, ἐν συγγραφαῖς, ἐν νοήμασιν, ἐν θυσίαις, ἐν ναοῖς, ἐν εἰκονίσμασι, τὸν μὲν ὡς Θεὸν καὶ δεσπότην προσκυνοῦντες καὶ σέβοντες, τοὺς δὲ διὰ τὸν κοινὸν δεσπότην ὡς αὐτοῦ γνησίους θεράποντας τιμῶντες καὶ τὴν κατὰ σχέσιν προσκύνησιν ἀπονέμοντες.
Αὕτη ἡ πίστις τῶν ἀποστόλων, αὕτη ἡ πίστις τῶν πατέρων, αὕτη ἡ πίστις τῶν ὀρθοδόξων, αὕτη ἡ πίστις τὴν οἰκουμένην ἐστήριξεν.
Ἐπὶ τούτοις τοὺς τῆς εὐσεβείας κήρυκας ἀδελφικῶς τε καὶ πατροποθήτως, εἰς δόξαν καὶ τιμὴν τῆς εὐσεβείας ὑπὲρ ἧς ἠγωνίσαντο, ἀνευφημοῦμεν καὶ λέγομεν.
Χαμαί. Γερμανοῦ, Ταρασίου, Νικηφόρου καὶ Μεθοδίου τῶν ὡς ἀληθῶς ἀρχιερέων Θεοῦ καὶ τῆς ὀρθοδοξίας προμάχων καὶ διδασκάλων, Αἰωνία ἡ μνήμη (γ΄).
Ἰγνατίου, Φωτίου, Στεφάνου, Ἀντωνίου καὶ Νικολάου τῶν ἁγιωτάτων καὶ ὀρθοδόξων πατριαρχῶν, Αἰωνία ἡ μνήμη (γ΄).
Ἅπαντα τὰ κατὰ τῶν ἁγίων πατριαρχῶν Γερμανοῦ, Ταρασίου, Νικηφόρου καὶ Μεθοδίου, Ἰγνατίου, Φωτίου, Νικηφόρου, Ἀντωνίου, καὶ Νικολάου γραφέντα ἢ λαληθέντα, Ἀνάθεμα (γ΄).
Ἅπαντα τὰ παρὰ τὴν ἐκκλησιαστικὴν παράδοσιν καὶ τὴν διδασκαλίαν καὶ ὑποτύπωσιν τῶν ἁγίων καὶ ἀοιδίμων πατέρων καινοτομηθέντα ἢ μετὰ τοῦτο πραχθησόμενα, Ἀνάθεμα (γ΄).
Στεφάνου τοῦ ὁσιομάρτυρος καὶ ὁμολογητοῦ τοῦ νέου, Αἰωνία ἡ μνήμη (γ΄).
Εὐθυμίου, Θεοφίλου καὶ Αἰμιλιανοῦ, τῶν ἀοιδίμων ὁμολογητῶν καὶ ἀρχιεπισκόπων, Αἰωνία ἡ μνήμη (γ΄).
Θεοφυλάκτου, Πέτρου, Μιχαὴλ καὶ Ἰωσήφ, τῶν μακαρίων μητροπολιτῶν, Αἰωνία ἡ μνήμη (γ΄).
Ἰωάννου, Νικολάου καὶ Γεωργίου, τῶν τρισολβίων ὁμολογητῶν καὶ ἀρχιεπισκόπων, καὶ πάντων τῶν ὁμοφρονησάντων αὐτοῖς ἐπισκόπων, Αἰωνία ἡ μνήμη (γ΄).
Θεοδώρου τοῦ πανοσίου ἡγουμένου τοῦ Στουδίτου, Αἰωνία ἡ μνήμη (γ΄).
Ἰσαακίου τοῦ θαυματουργοῦ καὶ Ἰωαννικίου τοῦ προφητικωτάτου, Αἰωνία ἡ μνήμη (γ΄).
Ἱλαρίωνος τοῦ ὁσιωτάτου ἀρχιμανδρίτου καὶ ἡγουμένου τῶν Δαλμάτων, Αἰωνία ἡ μνήμη (γ΄).
Συμεὼν τοῦ ὁσιωτάτου στυλίτου, Αἰωνία ἡ μνήμη (γ΄).
Θεοφάνους τοῦ ὁσιωτάτου ἡγουμένου τοῦ μεγάλου Ἀγροῦ, Αἰωνία ἡ μνήμη (γ΄).
Αὗται ὡς εὐλογίαι πατέρων ἀπ’ αὐτῶν εἰς ἡμᾶς τοὺς υἱοὺς ζηλοῦντας αὐτῶν τὴν εὐσέβειαν διαβαίνουσιν· ὡσαύτως δὲ καὶ αἱ ἀραὶ τοὺς πατραλοίας καὶ τῶν δεσποτικῶν ἐντολῶν ὑπερόπτας καταλαμβάνουσι· δι᾿ ὃ κοινῇ πάντες, ὅσον εὐσεβείας πλήρωμα, οὕτως αὐτοῖς τὴν ἀρὰν ἣν αὐτοὶ ἑαυτοὺς ὑπεβάλοντο ἐπιφέρομεν, Αἰωνία ἡ μνήμη (γ΄).
Τοῖς λόγῳ μὲν τὴν ἔνσαρκον οἰκονομίαν τοῦ Θεοῦ Λόγου δεχομένοις, ὁρᾶν δὲ ταύτην δι’ εἰκόνων οὐκ ἀνεχομένοις, καὶ διὰ τοῦτο ῥήματι μὲν κατασχηματιζομένοις, πράγματι δὲ τὴν σωτηρίαν ἡμῶν ἀρνουμένοις, Ἀνάθεμα (α΄).
Τοῖς τῷ ῥήματι τοῦ ἀπεριγράπτου κακῶς προσφυομένοις, καὶ διὰ τοῦτο μὴ βουλομένοις εἰκονογραφεῖσθαι τὸν παραπλησίως ἡμῖν σαρκὸς καὶ αἵματος κεκοινωνηκότα Χριστὸν τὸν ἀληθινὸν Θεὸν ἡμῶν, καὶ ἐντεῦθεν φαντασιασταῖς δεικνυμένοις, Ἀνάθεμα (α΄).
Τοῖς τὰς μὲν προφητικὰς ὁράσεις, κἂν μὴ βούλοιντο, παραδεχομένοις, τὰς δ’ ὀφθείσας αὐτοῖς εἰκονογραφίας –ὢ θαῦμα!– καὶ πρὸ σαρκώσεως τοῦ Λόγου μὴ καταδεχομένοις, ἀλλ’ ἢ αὐτὴν τὴν ἄληπτόν τε καὶ ἀθέατον οὐσίαν ὀφθῆναι τοῖς τεθεαμένοις κενολογοῦσιν, ἢ εἰκόνας μὲν ταῦτα τῆς ἀληθείας καὶ τύπους καὶ σχήματα ἐμφανισθῆναι τοῖς ἑωρακόσι συντιθεμένοις, εἰκονογραφεῖν δὲ ἐνανθρωπήσαντα τὸν Λόγον καὶ τὰ ὑπὲρ ἡμῶν αὐτοῦ πάθη οὐκ ἀνεχομένοις, Ἀνάθεμα (α΄).
Τοῖς ἀκούουσι τοῦ Κυρίου ὡς «εἰ ἐπιστεύετε Μωϋσῇ, ἐπιστεύετε ἂν ἐμοὶ» καὶ τὰ ἑξῆς, καὶ τὸ «προφήτην ὑμῖν ἀναστήσει ὁ Κύριος ὁ Θεὸς ἡμῶν ὡς ἐμὲ» τοῦ Μωσέως λέγοντος, συνιοῦσιν, εἶτα λέγουσι δέξασθαι μὲν τὸν προφήτην, οὐκ εἰσάγουσι δὲ δι’ εἰκονισμάτων τὴν τοῦ προφήτου χάριν καὶ τὴν παγκόσμιον σωτηρίαν, ὡς ὡράθη, ὡς συνανεστράφη ἀνθρώποις, ὡς πάθη καὶ νόσους ἰάσεως μείζονας ἐθεράπευσεν, ὡς ἐσταυρώθη, ὡς ἐτάφη, ὡς ἀνέστη, ὡς πάντα τὰ ὑπὲρ ἡμῶν ἔπαθέ τε καὶ ἐποίησε· τοῖς οὖν ταῦτα τὰ παγκόσμια καὶ σωτήρια ἔργα ἐν εἰκόσιν ὁρᾶν μὴ ἀνεχομένοις μηδὲ τιμῶσιν αὐτὰ καὶ προσκυνοῦσιν, Ἀνάθεμα (γ΄).
Τοῖς ἐπιμένουσι τῇ εἰκονομάχῳ αἱρέσει, μᾶλλον δὲ τῇ χριστομάχῳ ἀποστασίᾳ, καὶ μήτε διὰ τῆς μωσαϊκῆς νομοθεσίας πρὸς τὴν σωτηρίαν αὐτῶν ἀναχθῆναι βουλομένοις μήτε ταῖς ἀποστολικαῖς διδασκαλίαις ἐναστραφθῆναι τὴν εὐσέβειαν προαιρουμένοις μήτε ταῖς πατρικαῖς παραινέσεσι καὶ εἰσηγήσεσι τῆς πλάνης αὐτῶν ἐπιστραφῆναι πειθομένοις μήτε τῇ συμφωνίᾳ τῶν ἀνὰ πᾶσαν τὴν οἰκουμένην ἐκκλησιῶν τοῦ Θεοῦ δυσωπουμένοις, ἀλλ’ ἐφ’ ἅπαξ ἑαυτοὺς τῇ τῶν Ἰουδαίων καὶ ῾Ελλήνων μερίδι καθυποβαλλομένους· ἃ γὰρ ἀμέσως ἐκεῖνοι εἰς τὸ πρωτότυπον βλασφημοῦσι, καὶ οὗτοι διὰ τῆς αὐτοῦ εἰκόνος εἰς αὐτὸν ἐκεῖνον τὸν εἰκονιζόμενον τολμᾶν οὐκ ἐρυθριῶσι· τοῖς οὖν ἀνεπιστρόφως τῇ πλάνῃ ταύτῃ κατεχομένοις καὶ πρὸς πάντα λόγον θεῖον καὶ πνευματικὴν διδασκαλίαν τὰ ὦτα βεβυσμένοις, ὡς ἤδη λοιπὸν σεσηπόσι καὶ τοῦ κοινοῦ σώματος τῆς Εκκλησίας ἀποτεμοῦσιν ἑαυτούς, Ἀνάθεμα (γ΄).
Τοῖς εἰσάγουσιν ἐπὶ τῆς ἀρρήτου ἐνσάρκου οἰκονομίας τοῦ Κυρίου καὶ Θεοῦ καὶ σωτῆρος ἡμῶν Ἰησοῦ Χριστοῦ καινοφωνίας τινάς, καὶ λέγουσιν ἢ φρονοῦσι προσκυνεῖν τὸ ἀνθρώπινον τοῦ Χριστοῦ τῇ ἀπροσίτῳ θεότητι δουλικῶς, καὶ τὴν δουλείαν ἀίδιον κεκτῆσθαι ὡς οὐσιώδη καὶ ἀναπόβλητον, Ἀνάθεμα (γ΄).
Τοῖς μὴ μετὰ πάσης εὐλαβείας χρωμένοις τῇ κατ' ἐπίνοιαν διαιρέσει πρὸς δήλωσιν μόνον τῆς ἑτερότητος τῶν ἐν Χριστῷ συνδραμουσῶν ἀρρήτως δύο φύσεων καὶ ἐν αὐτῷ ἀσυγχύτως καὶ ἀδιαιρέτως ἡνωμένων, ἀλλὰ καταχρωμένοις τῇ τοιαύτῃ διαιρέσει καὶ λέγουσι «τὸ πρόσλημμα οὐ τῇ φύσει μόνον ἕτερον, ἄλλα καὶ τῇ ἀξίᾳ» καὶ ὅτι «λατρεύει Θεῷ καὶ ὑπηρεσίαν προσφέρει δουλικὴν καὶ τιμὴν τὴν προσήκουσαν ἀπονέμει ὡς ὀφειλήν, καθά περ τὰ λειτουργικὰ πνεύματα τὰ τῷ Θεῷ ὑπηρετοῦντά τε καὶ λατρεύοντα δουλικῶς», καὶ ἰδίᾳ «τὸ πρόσλημμα ἀρχιερέα μέγιστον εἶναι» διδάσκουσι, καὶ οὐχὶ τὸν Θεὸν Λόγον ὅτι γέγονεν ἄνθρωπος, ὡς διὰ τῶν τοιούτων τὸν ἕνα Χριστὸν τὸν Κύριον ἡμῶν καὶ Θεὸν διαιρεῖν τολμῶσιν ὑποστατικῶς, Ἀνάθεμα (γ΄).
Τοῖς λέγουσιν, ὅτι τὴν ἐν τῷ καιρῷ τοῦ κοσμοσωτηρίου πάθους τοῦ Κυρίου καὶ Θεοῦ καὶ σωτῆρος ἡμῶν Ἰησοῦ Χριστοῦ προσαχθεῖσαν ὑπὲρ τῆς ἡμῶν σωτηρίας παρ' αὐτοῦ θυσίαν τοῦ τιμίου αὐτοῦ σώματός τε καὶ αἵματος, ὡς ἀρχιερέως, κατὰ τὸ ἀνθρώπινον δι' ἡμᾶς χρηματίσαντος, ὅτι περ ὁ αὐτὸς καὶ Θεὸς καὶ θύτης καὶ θῦμα, κατὰ τὸν πολὺν ἐν θεολογίᾳ Γρηγόριον, προσήγαγε μὲν αὐτὸς τῷ Θεῷ καὶ Πατρί, οὐ προσεδέξατο δὲ ὡς Θεὸς μετὰ τοῦ Πατρός, αὐτός τε ὁ μονογενὴς καὶ τὸ Πνεῦμα τὸ ἅγιον, ὡς διὰ τούτων ἀποξενοῦσιν αὐτόν τε τὸν Θεὸν Λόγον καὶ τὸ ὁμοούσιον καὶ ὁμόδοξον τούτου παράκλητον Πνεῦμα τῆς θεοπρεποῦς ὁμοτιμίας τε καὶ ἀξίας, Ἀνάθεμα (γ΄).
Τοῖς τὴν καθ' ἕκαστην προσαγομένην θυσίαν ὑπὸ τῶν παραλαβόντων ἀπὸ Χριστοῦ τὴν τῶν θείων μυστηρίων ἱερουργίαν, μὴ δεχομένοις τῇ ἁγίᾳ Τριάδι προσάγεσθαι, ὡς ἀντιφθεγγομένοις ἐντεῦθεν τοῖς ἱεροῖς καὶ θείοις πατράσι Βασιλείῳ τε καὶ Χρυσορρήμονι, οἷς συμφωνοῦσι καὶ οἱ λοιποὶ θεοφόροι πατέρες ἐν τοῖς οἰκείοις λόγοις τε καὶ συγγράμμασιν, Ἀνάθεμα (γ΄).
Τοῖς ἀκούουσι μὲν τοῦ σωτῆρος περὶ τῆς παρ' αὐτοῦ παραδοθείσης τῶν θείων μυστηρίων ἱερουργίας λέγοντος· «τοῦτο ποιεῖτε εἰς τὴν ἐμὴν ἀνάμνησιν», μὴ ἐκλαμβανομενοις δὲ ὀρθῶς τὴν ἀνάμνησιν, ἀλλὰ τολμῶσι λέγειν ὅτι καινίζει φανταστικῶς καὶ εἰκονικῶς τὴν ἐπὶ τοῦ τιμίου σταυροῦ παρὰ τοῦ σωτῆρος ἡμῶν προσαχθεῖσαν θυσίαν τοῦ ἰδίου σώματός τε καὶ αἵματος, εἰς κοινὸν τῆς ἀνθρωπίνης φύσεως λύτρον τε καὶ ἐξίλασμα, ἡ καθ' ἑκάστην προσαγομένη θυσία παρὰ τῶν τὰ θεῖα ἱερουργούντων μυστήρια, καθὼς ὁ σωτὴρ ἡμῶν καὶ δεσπότης τῶν ὅλων παρέδωκε· καὶ διὰ τοῦτο ἄλλην εἶναι ταύτην παρὰ τὴν ἐξ ἀρχῆς τῷ σωτῆρι τετελεσμένην εἰσάγουσι καὶ πρὸς ἐκείνην φανταστικῶς καὶ εἰκονικῶς ἀναφερομένην, ὡς κενοῦσι τὸ τῆς φρικτῆς καὶ θείας ἱερουργίας μυστήριον, δι' οὗ τὸν τῆς μελλούσης ζωῆς ἀρραβῶνα λαμβάνομεν, καὶ ταῦτα τοῦ θείου πατρὸς ἡμῶν Ἰωάννου τοῦ χρυσορρήμονος διατρανοῦντος τῆς θυσίας τὸ ἀπαράλλακτον καὶ μίαν καὶ τὴν αὐτὴν εἶναι φάσκοντος ἐν πολλαῖς τῶν τοῦ μεγάλου Παύλου ῥητῶν ἐξηγήσεσιν, Ἀνάθεμα (γ΄).
Τοῖς τὰς χρονικὰς διαστάσεις ἐπὶ τῆς καταλλαγῆς τῆς ἀνθρωπίνης φύσεως πρὸς τὴν θείαν καὶ μακαρίαν φύσιν τῆς ζωαρχικῆς καὶ πανακηράτου Τριάδος ἐπινοοῦσι καὶ παρεισάγουσι, καὶ πρότερον μὲν τῷ μονογενεῖ Λόγῳ νομοθετοῦσιν ἐξ αὐτῆς κατηλλάχθαι ἡμᾶς τῆς προσλήψεως, ὕστερον δὲ τῷ Θεῷ καὶ Πατρὶ κατὰ τὸ σωτήριον πάθος τοῦ σωτῆρος Χριστοῦ, καὶ διαιροῦσι τὰ ἀδιαίρετα τῶν θείων καὶ μακαρίων πατέρων διὰ τοῦ τῆς οἰκονομίας μυστηρίου παντὸς καταλλάξαι ἡμᾶς ἑαυτῷ τὸν μονογενῆ διδασκόντων, δι’ ἑαυτοῦ τε καὶ ἐν ἑαυτῷ τῷ Θεῷ καὶ Πατρί, ἀκολούθως δὲ πάντως καὶ τῷ παναγίῳ καὶ ζωοποιῷ Πνεύματι, ὡς καινῶν καὶ ἐκφύλων ἐφευρεταῖς, Ἀνάθεμα (γ΄).
Ἀναστασίῳ, Κωνσταντίνῳ καὶ Νικήτᾳ, τοῖς ἐπὶ τῶν Ἰσαύρων κατάρξασι τῶν αἱρέσεων, ὡς ἀνιέροις καὶ ὁδηγοῖς ἀπωλείας, Ἀνάθεμα (γ΄).
Θεοδότῳ, Ἀντωνίῳ καὶ Ἰωάννῃ, τοῖς ἀλληλοπροξένοις τῶν κακῶν καὶ ἑτεροδιαδόχοις τὴν δυσσέβειαν, Ἀνάθεμα (γ΄).
Παύλῳ τῷ εἰς Σαῦλον ἀποστρέψαντι καὶ Θεοδώρῳ τῷ ἐπικαλουμένῳ Γάστῃ καὶ Στεφάνῳ τῷ Μολύτῃ, ἔτι δὲ καὶ Θεοδώρῳ τῷ Κριθίνῳ καὶ Λαλουδίῳ τῷ Λέοντι, καὶ πρὸς τούτοις, εἴ τις τοῖς εἰρημένοις ὅμοιος τὴν δυσσέβειαν, ἐν ὁποίῳ ἂν εἴη καταλόγῳ κλήρου, ἀξιώματος τινὸς ἢ ἐπιτηδεύματος ἐξεταζόμενος· τούτοις ἅπασιν ἐπιμένουσιν αὐτῶν τῇ δυσσεβείᾳ, Ἀνάθεμα (γ΄).
Γεροντίῳ τῷ ἐκ Λάμπης μὲν ὁρμωμένῳ, ἐν δὲ τῇ Κρήτῃ τὸν ἰὸν τῆς αὐτοῦ μυσαρᾶς αἱρέσεως ἐξεμέσαντι καὶ ἠλειμμένον ἑαυτὸν ἀποκαλέσαντι ἐπ’ ἀνατροπῇ –φεῦ!– τῆς σωτηριώδους οἰκονομίας τοῦ Χριστοῦ σὺν τοῖς διεστραμμένοις αὐτοῦ δόγμασι καὶ συγγράμμασι καὶ τοῖς ὁμόφροσιν αὐτῷ, Ἀνάθεμα (γ΄).
Τοῦ Ἰταλοῦ Ἰωάννου. Κεφάλαιον ΙΑ΄
Τοῖς ὅλως ἐπιχειροῦσιν οἵαν δή τινα ζήτησιν καὶ διδαχὴν τῇ ἀρρήτῳ ἐνσάρκῳ οἰκονομίᾳ τοῦ σωτῆρος ἡμῶν καὶ Θεοῦ ἐπάγειν καὶ ζητεῖν οἵῳ τρόπῳ αὐτὸς ὁ Θεὸς Λόγος τῷ ἀνθρωπίνῳ φυράματι ἥνωται καὶ τὴν προσληφθεῖσαν σάρκα κατὰ τίνα λόγον ἐθέωσε, καὶ λόγοις διαλεκτικοῖς φύσιν καὶ θέσιν ἐπὶ τῆς ὑπὲρ φύσιν καινοτομίας τῶν δύο φύσεων τοῦ Θεοῦ καὶ ἀνθρώπου λογομαχεῖν πειρωμένοις, Ἀνάθεμα (γ΄).
Τοῖς εὐσεβεῖν μὲν ἐπαγγελλομένοις, τὰ τῶν Ἑλλήνων δὲ δυσσεβῆ δόγματα τῇ ὀρθοδόξῳ καὶ καθολικῇ ἐκκλησίᾳ περί τε ψυχῶν ἀνθρωπίνων καὶ οὐρανοῦ καὶ γῆς καὶ τῶν ἄλλων κτισμάτων ἀναιδῶς ἢ μᾶλλον ἀσεβῶς ἐπεισάγουσιν, Ἀνάθεμα (γ΄).
Τοῖς τὴν μωρὰν τῶν ἔξωθεν φιλοσόφων λεγομένην σοφίαν προτιμῶσι καὶ τοῖς καθηγηταῖς αὐτῶν ἑπομένοις καὶ τάς τε μετεμψυχώσεις τῶν ἀνθρωπίνων ψυχῶν ἢ καὶ ὁμοίως τοῖς ἀλόγοις ζῴοις ταύτας ἀπόλλυσθαι καὶ εἰς τὸ μηδὲν χωρεῖν δεχομένοις, καὶ διὰ τούτων ἀνάστασιν καὶ κρίσιν καὶ τὴν τελευταίαν τῶν βεβιωμένων ἀνταπόδοσιν ἀθετοῦσιν, Ἀνάθεμα (γ΄).
Τοῖς τὴν ὕλην ἄναρχον καὶ τὰς ἰδέας ἢ συνάναρχον τῷ δημιουργῷ πάντων καὶ Θεῷ δογματίζουσι, καὶ ὅτι περ οὐρανὸς καὶ γῆ καὶ τὰ λοιπὰ τῶν κτισμάτων ἀίδιά τε εἰσὶ καὶ ἄναρχα καὶ διαμένουσιν ἀναλλοίωτα, καὶ ἀντινομοθετοῦσι τῷ εἰπόντι· «ὁ οὐρανὸς καὶ ἡ γῆ παρελεύσονται, οἱ δὲ λόγοι μου οὐ μὴ παρέλθωσι», καὶ ἀπὸ γῆς κενοφωνοῦσι καὶ τὴν θείαν ἀρὰν ἐπὶ τὰς ἑαυτῶν ἄγουσι κεφαλάς, Ἀνάθεμα (γ΄).
Τοῖς λέγουσιν ὅτι οἱ τῶν Ἑλλήνων σοφοὶ καὶ πρῶτοι τῶν αἱρεσιαρχῶν, οἱ παρὰ τῶν ἑπτὰ ἁγίων καὶ καθολικῶν συνόδων καὶ παρὰ πάντων τῶν ὀρθοδοξίᾳ λαμψάντων πατέρων ἀναθέματι καθυποβληθέντες ὡς ἀλλότριοι τῆς καθολικῆς ἐκκλησίας, διὰ τὴν ἐν λόγοις αὐτῶν κίβδηλον καὶ ῥυπαρὰν περιουσίαν, κρείττονες εἰσὶ κατὰ πολὺ καὶ ἐνταῦθα καὶ ἐν τῇ μελλούσῃ κρίσει, καί τῶν εὐσεβῶν μὲν καὶ ὀρθοδόξων ἀνδρῶν, ἄλλως δὲ κατὰ πάθος ἀνθρώπινον ἢ ἀγνόημα πλημμελησάντων, Ἀνάθεμα (α΄).
Τοῖς μὴ πίστει καθαρᾷ καὶ ἁπλῇ καὶ ὁλοψύχῳ καρδίᾳ τὰ τοῦ σωτῆρος ἡμῶν καὶ Θεοῦ καὶ τῆς ἀχράντως αὐτὸν τεκούσης δεσποίνης ἡμῶν θεοτόκου καὶ τῶν λοιπῶν ἁγίων ἐξαίσια θαύματα δεχομένοις, ἀλλὰ πειρωμένοις ἀποδείξεσι καὶ λόγοις σοφιστικοῖς ὡς ἀδύνατα διαβάλλειν ἢ κατὰ τὸ δοκοῦν αὐτοῖς παρερμηνεύειν καὶ κατὰ τὴν ἰδίαν γνώμην συνιστᾶν, Ἀνάθεμα (α΄).
Τοῖς τὰ ἑλληνικὰ διεξιοῦσι μαθήματα καὶ μὴ διὰ παίδευσιν μόνον ταῦτα παιδευομένοις, ἀλλὰ καὶ ταῖς δόξαις αὐτῶν ταῖς ματαίαις ἑπομένοις καὶ ὡς ἀληθέσι πιστεύουσι, καὶ οὕτως αὐταῖς ὡς τὸ βέβαιον ἐχούσαις ἐγκειμένοις, ὥστε καὶ ἑτέρους ποτὲ μὲν λάθρᾳ ποτὲ δὲ φανερῶς ἐνάγειν αὐταῖς καὶ διδάσκειν ἀνενδοιάστως, ἀνάθεμα (α΄).
Τοῖς μετὰ τῶν ἄλλων μυθικῶν πλασμάτων ἀφ’ ἑαυτῶν καὶ τὴν καθ’ ἡμᾶς πλάσιν μεταπλάττουσι καὶ τὰς πλατωνικὰς ἰδέας ὡς ἀληθεῖς δεχομένοις καὶ ὡς αὐθυπόστατον τὴν ὕλην παρὰ τῶν ἰδίων μορφοῦσθαι λέγουσι καὶ προφανῶς διαβάλλουσι τὸ αὐτεξούσιον τοῦ δημιουργοῦ τοῦ ἀπὸ τοῦ μὴ ὄντος εἰς τὸ εἶναι παραγαγόντος τὰ πάντα καὶ ὡς ποιητοῦ πᾶσιν ἀρχὴν καὶ τέλος ἐπιτιθέντος ἐξουσιαστικῶς καὶ δεσποτικῶς, Ἀνάθεμα (γ΄).
Τοῖς λέγουσιν ὅτι ἐν τῇ τελευταίᾳ καὶ κοινῇ ἀναστάσει μεθ’ ἑτέρων σωμάτων οἱ ἄνθρωποι ἀναστήσονται καὶ κριθήσονται, καὶ οὐχὶ μεθ’ ὧν κατὰ τὸν παρόντα βίον ἐπολιτεύσαντο, ἅτε τούτων φθειρομένων καὶ ἀπολλυμένων, καὶ ληροῦσι κενὰ καὶ μάταια κατ᾿ αὐτοῦ τοῦ Χριστοῦ καὶ Θεοῦ ἡμῶν καὶ τῶν μαθητῶν αὐτοῦ, διδασκάλων δὲ ἡμετέρων, οὕτω διδαξάντων ὡς μεθ’ ὧν ἐπολιτεύσαντο ἄνθρωποι σωμάτων μετὰ τούτων καὶ κριθήσονται, ἔτι δὲ καὶ τοῦ μεγάλου ἀποστόλου Παύλου, καὶ διαρρήδην ἐν τῷ περὶ ἀναστάσεως λόγῳ πλατύτερον διὰ παραδειγμάτων τὴν ἀλήθειαν ἀναδιδάξαντος καὶ τοὺς ἑτέρως φρονοῦντας ὡς ἄφρονας ἀπελέγξαντος· τοῖς γοῦν τοῖς τοιούτοις ἀντινομοθετοῦσι δόγμασι καὶ διδάγμασιν, Ἀνάθεμα (α΄).
Τοῖς δεχομένοις καὶ παραδιδοῦσι τὰ μάταια καὶ ἑλληνικὰ ῥήματα· ὅτι τε προΰπαρξις ἐστ thriskeftika
ΜΟΙΡΑΣΤΕΙΤΕ
ΔΕΙΤΕ ΑΚΟΜΑ
ΣΧΟΛΙΑΣΤΕ
![Ήλπιζαν να συναντήσουν μια φάλαινα, αλλά να ζήσουν κάτι τέτοιο, ούτε στα πιο τρελά όνειρα τους... [video]](https://images.newsnowgreece.com/110/1107875/ilpizan-na-synantisoun-mia-falaina-alla-na-zisoun-kati-tetoio-oute-sta-pio-trela-oneira-tous-video-1-124x78.jpg)
